Shymkentte basyna kirpish qulaǵan jumysshy oqıǵa ornynda mert bolǵan
ShYMKENT. QazAqparat - Shymkentte jańadan kópqabatty úıdi turǵyzyp jatqan qurylysshylardyń biriniń basyna kirpish qulap ketken. Aýyr jaraqattanǵan 46 jastaǵy jumysshy sol jerde kóz jumǵan, dep habarlaıdy QazAqparat HAA tilshisi.
Óńirdiń eńbek ınspektsııasynyń málimetinshe, qaıǵyly jaǵdaı «Nursát» shaǵynaýdanyndaǵy qurylys nysandarynyń birinde bolǵan. Qurylysshylar jumys júrgizip jatqan kezde, aıaq astynan jel turyp ketken. Sol kezde jeldiń ekpinine shydas bermegen joǵary qabattaǵy kirpish syrǵyp ketip, jumysshynyń basyna túsip ketipti. Qaıtys bolǵan qurylysshy Arys aýdanynyń turǵyny ekeni anyqtaldy. Qazir osy derek boıynsha polıtseıler eńbek qaýipsizdiginiń erejesin buzý deregimen qylmystyq is qozǵady.
Sondaı-aq eńbek ınspektsııasy qyzmetkerleri de tekserý sharalaryn bastap ketti. Onyń qorytyndysy eki aptadan keıin belgili bolady dep otyr.
«Qaıtys bolǵan qyzmetkerler jańaǵy jumys berýshi tarapynan eńbek qaýipsizdigi sharalaryn jasaǵanyn aıtyp jatyr. Bul boıynsha arnaıy tekserý komıssııasy qurylyp, tekserý amaldary júrgizilip jatyr. Oǵan deıin adam ólimine ákep soqqan qaıǵyly jaǵdaıǵa kimniń kináli ekenin naqty aıtý qıyn», - deıdi oblystyq eńbek ınspektsııasy basqarmasy basshysynyń orynbasary Bekmahan Nurmahanov.
Eske salaıyq, dál osyndaı qaıǵyly jaǵdaı bir apta buryn "Asar" shaǵyn aýdanynda da bolǵan edi. 29 jastaǵy jigit jańadan salynyp jatqan turǵyn úıdiń 8-shi qabatynan qulap, mert boldy. 
Jalpy, jyl basynan beri ońtústikte 77 jazataıym jaǵdaı tirkelse, odan 83 jumysshy zardap shekken. Olardyń 42-si aýyr dene jaraqatyn alyp, 13-i mert bolǵan.
