Shymkentte bastaýysh synyp oqýshylary 100 paıyz ystyq tamaqpen qamtyldy
Shymkent qalasy ákiminiń qaýlysyna sáıkes, oqý jylynyń úshinshi toqsanynan bastap megapolıs mektepterinde bastaýysh synyp oqýshylaryna tegin ystyq tamaq berile bastady.
Osyǵan deıin bir mezgil tegin ystyq tamaq tek áleýmettik jaǵdaıyna qaraı berilgen bolsa, endi memlekettik jáne jekemenshik mektepterdiń 1-4 synyp oqýshylary júz paıyz ystyq tamaqpen qamtyldy. Bul múmkindik qaladaǵy memlekettik bilim berý ordasyndaǵy – 88 657, jekemenshik mektepterdegi 12 500 bastaýysh synyp oqýshysyna berildi. Sonymen qatar memlekettik bilim uıalaryndaǵy áleýmettik jaǵdaıy tómen otbasynda tárbıelenetin 28 367 joǵary synyp oqýshysy tegin tamaqtanýda.
Mektep ashanalarynyń as máziri Sanıtarııalyq-epıdemıologııalyq baqylaý departamentiniń kelisimi arqyly arnaıy talaptar saqtala otyryp, qalalyq bilim basqarmasymen jasaqtalyp usynylǵan.
