Shymkentte barlyq sýburqaqtar iske qosyldy
ShYMKENT. QazAqparat - Shymkentte kún jylyp ketken soń qaladaǵy barlyq sýburqaqtar iske qosyldy, dep habarlaıdy QazAqparat tilshisi.
Qala ákimdiginiń málimetinshe, shaharda 21 sýburqaq bar. Olardyń basym kópshiligi 21 naýryz kúni iske qosylǵan. Sýburqaqtardyń qosylý kestesi qala ákimdiginiń Instagram paraqshasynda kórsetilgen.
«Bıylǵy maýsymda sýburqaqtar jyldaǵyndan erte iske qosyldy. Ondaǵy tazalaý, jóndeý jumystary kóktemge deıin júrgizilip, 21-i tolyq jańartyldy. Endi barlyǵy da kestege saı qosylýda. Óshirý ýaqyty túngi 23:00 dep belgilengen», - deıdi ákimdik qyzmetkerleri.
Sýburqaqtardyń kópshiligi tańerteń 7.30-dan qosylady. Sóıtip qala turǵyndaryna kóterińki kóńil kúı syılaıdy. Tek ekeýi ǵana - Táýelsizdik saıabaǵy men oblys ákimdiginiń aldyndaǵy áýendi fontandar keshki 20.00-de iske qosylady.
