Shymkentte bank tonaýshy jaldap turǵan úıdiń ıesi jazalandy
ASTANA. QazAqparat - OQO ІІD Kóshi-qon polıtsııasynyń qyzmetkerleri bankke qaraqshylyq shabýyl jasaǵan jigit jaldap turǵan páterdiń ıesine aıyppul saldy, dep habarlaıdy Otyrar.kz.
Er adam urlaǵan aqshasyn páterde saqtamaǵan, basqa bankke aparyp salǵan. Ustalǵan kezde odan 400 myń teńge tabylǵan. Qalǵany bankte bolǵany anyqtalǵan.
Ol 1961 jyly týǵan Shymkent qalasynyń turǵynynyń páterin bir jyldaı jaldap turǵan. Áıel adamǵa QR ÁK 492-baby boıynsha (QR aýmaǵynda jeke kýáliksiz turý) 5AEK kóleminde aıyppul salyndy.
Eske sala keteıik, er adam 13 qazan kúni Kaspıı banktiń Shymkent qalasyndaǵy bólimshesine qaraqshylyq shabýyl jasaǵan.
Qylmys barysy baqylaý kamerasynyń nysanasyna ilikken . Basqynshy bank ǵımaratynyń negizgi kire beris esiginen erkin kirgen. Betin mata betperdemen tumshalap alǵan ol «jarylǵysh paketke» uqsas zatty edenge laqtyryp, atalǵan zat tútindeı bastaǵan kezde bank qyzmetkerlerin baltamen qorqytyp, ulttyq jáne sheteldik valıýtadaǵy kólemdi qarajatty alǵan. Osydan keıin ol qylmys ornynan boı tasalaǵan.
Buǵan deıin QR ІІM Memlekettik til jáne aqparat departamentiniń dırektory Almas Sadýbaev habarlaǵandaı , kúdiktiniń turǵylyqty meken jaıynan urlanǵan aqshanyń biraz bóligi, sómke, qolǵap jáne jasalǵan qylmysqa onyń qatysy bar ekendigin dáleldeıtin ózge de zattaı aıǵaqtar tabylyp, tárkilendi. Osy iske qatysty tergeý jalǵasýda.
Atalǵan fakti boıynsha QR Qylmystyq kodeksiniń «Qaraqshylyq» 192 baby 4 tarmaǵy boıynsha qylmystyq óndiris ashyldy. Sotqa deıingi tergeý amaldary aıasynda jasalǵan qylmystyń barlyq mán-jaıy anyqtalyp, kúdiktiniń basqa da oryn alǵan qylmystarǵa qatystylyǵy týraly málimetter tekserilýde.
