Shymkentte balmuzdaq satatyn 57 núkteden 100-ge jýyq buzýshylyq anyqtaldy

Balmuzdaq satatyn oryndarda sanıtarlyq talaptar saqtalmaǵan, qyzmetkerlerde medıtsınalyq kitapshalar bolmaǵan. Tıisti tekserý sharalaryn júrgizgen Oblystyq qoǵamdyq densaýlyq saqtaý departamentiniń mamandary osyndaı kemshilikterdi anyqtaǵan.

Departament mamandarynyń sózinshe, Shymkentte adamdar balmuzdaqtan jappaı ýlanǵan soń sanıtarlyq dárigerler qalada quımaly tátti satatyn 68 dúńgirshekti anyqtaǵan. Solardyń 57-sine tekserý júrgizilip, tazalyq normalarynyń saqtalmaıtyny belgili bolǵan.

"20 saýda orny quzyrly mekemelerge quımaly balmuzdaq satatyny jóninde habar bermegen. Bes dúńgirshekte sý qubyrlary men káriz júıeleri tartylmaǵany anyqtaldy. 16 nysanda pasterlenbegen sútti paıdalanǵan, altaýynda sút ónimderiniń sapasy jáne qaýipsiz ekenin dáleldeıtin qujattar bolmaı shyqty. Budan bólek, saýda núktelerindegi 16 qyzmetkerde medıtsınalyq kitapshalardyń joqtyǵy, 17 adamnyń talapqa saı kıimderiniń bolmaǵandyǵy anyqtaldy. 21 dúńgirshekte balmuzdaqqa qajetti qospalar úı jaǵdaıynda daıyndalatyny belgili boldy", - dedi  OQO Qoǵamdyq densaýlyq saqtaý departamenti basshysynyń orynbasary Aldarqul Ahmetov.

Qazirgi tańda barlyq kemshilikter boıynsha ákimshilik hattamalar toltyrylyp, tıisti sharalar qabyldanbaq. Al jurttyń jappaı ýlanýyna sebep bolǵan «ıÝjnoe» saýda núktesi sot sheshimi shyqqanǵa deıin ýaqytsha jabyq tur. Sala mamandarynyń sózinshe, tıisti tekserýler boıynsha sońǵy qorytyndy osy aptanyń sońynda belgili bolady.

Esterińizge sala keteıik, naýryzdyń sońynda balmuzdaqtan ýlanǵan 188 adam Shymkenttegi juqpaly aýrýlar aýrýhanasyna túsken edi. Olardyń arasynda balmuzdaq satatyn orynnyń eki qyzmetkeri bar. Olardan salmonellez tabylǵan. Taǵy bir satýshydan stafılokokk taıaqshasy anyqtaldy. Tıisti tekserý sharalary barysynda «ıÝjnoe» saýda núktesinen kóptegen kemshilikter shyǵyp, osy jaǵdaıǵa baılanysty  qylmystyq is qozǵaldy. Tergeý áli de júrgizilýde.