Shymkentte balalardy tonaǵan reseılik jasóspirim ustaldy
ShYMKENT. QazAqparat - Reseılik jasóspirim shymkenttik balalardy tonap kelgen. 17 jastaǵy sheteldik azamat qazir ýaqytsha ustaý abaqtysyna qamaýǵa alyndy. Oǵan tonaýǵa boıynsha 7 derekke qatysty degen aıyp taǵylýda. Bul týraly QazAqparat HAA tilshisi habarlady.
Belgili bolǵandaı, Ál-Farabı aýdandyq polıtsııa bólimine birneshe turǵyn aryzdanǵan. Olar belgisiz bireý aýlalarda oınap júrgen balalarynyń uıaly telefondary men velosıpedterin tonap ketkenin kórsetipti. Osydan keıin tártip saqshylary kópqabatty úılerdiń mańyn qarap, kimniń tonap júrgenin anyqtamaq bolǵan. Birneshe aı boıy tekserý sharalaryn júrgizgen polıtseıler aqyry tonaýshyny qolǵa túsirdi.
Ol kámelet jasyna tolmaǵan reseılik bolyp shyqty. Qazir 2000 jylǵy kúdikti quqyq qorǵaý organy ókilderine jaýap berýde. Onyń sózinshe ol jábirlenýshiler retinde ózinen kishi balalardy taýyp alyp otyrǵan. «Uıaly telefonmen sóılesip alaıyn» ne bolmasa «velosıpediń minip kórsem bola ma degen sııaqty syltaýlarmen surap alyp, ıemdenip ketip júrgen.
Urlanǵan zattardy saýdalap, qajetine jaratyp kelgenin moıyndady. Qazir sezikti ýaqytsha tergeý abaqtysyna qamaýǵa alynyp, onyń ústinen Qylmystyq kodekstiń 191 «Tonaý» babymen is qozǵaldy. Jábirlenýshilerdiń zattary tárkilenip, tergeý amaldary júrgizilýde. Polıtseıler sondaı-aq sheteldik jasóspirimniń osy syndy ózge de qylmystarǵa qatysy bar bolýy múmkin ekenin aıtady.
