Shymkentte bala satatyny jóninde jarnama bergen turǵyn izdestirilýde

ShYMKENT. QazAqparat - Shymkentte «bala satamyn» dep jarnama bergen turǵyn izdestirilýde. Mundaı mátindegi jazbalardy ol «Vkontakte» áleýmettik jelisinde jarııalanǵan, dep habarlaıdy QazAqparat tilshisi.

Qalalyq polıtsııa departamenti baspasóz qyzmetiniń habarlaýynsha, sábı saýdalaýǵa qatysty jarnamany alǵash bolyp jergilikti turǵyndar baıqaǵan. Sóıtip polıtsııaǵa habarlasyp, anyqtaýdy suraǵan.

«13 qazanda polıtsııaǵa azamattar habarlasyp, osy oqıǵa týraly aıtty. Bul jóninde shuǵyl sharalar júrgizilip, jarnama bergen adam izdestirilýde. Alaıda ol adam artynsha akkaýntyn óshirip tastaýyna baılanysty aty-jóni áli anyqtalmady. Qazirgi tańda bul oqıǵa boıynsha Qylmysty kodekstiń 128-baby 1-bóligine sáıkes «Adam saýdasy» boıynsha sotqa deıingi tergep-tekserý sharalary júrgizilip jatyr. Tergeýdiń qupııalyǵyna baılanysty ózge málimetter jarııa etilmeıdi», - dedi baspasóz qyzmetiniń jetekshisi Ásel Sádenova.