Shymkentte Badam ózenindegi kópir paıdalanýǵa berildi

NUR-SULTAN. QazAqparat - 1 jeltoqsan - «QR Tuńǵysh Prezıdenti kúni» merekesine oraı Badam ózeniniń ústinen ótetin kópir el ıgiligine berildi, dep habarlaıdy Shymkent qalasy ákimdiginiń baspasóz qyzmeti.

A-2 «Qorǵas-Almaty-Shymkent-Ózbekstan Respýblıkasynyń shekarasy» avtomobıl jolyn qaıta qurý jumystary tolyǵymen aıaqtaldy.

Qala ákimi Murat Áıtenov qurylysy aıaqtalǵan kópirdiń ashylý rásimine qatysty.

Qoldanystaǵy bul kópir 1970 jyldary salynǵan. Uzyndyǵy 144 metr, eni 11 metrdi quraıtyn. 2005 jyly kópirdiń tehnıkalyq jaǵdaıy apatty dep tanyldy.

2016 jyly atalǵan respýblıkalyq mańyzy bar avtomobıl joly Shymkent qalasynyń teńgerimine qabyldanyp, 31,6 shaqyrym joldy qaıta qurý jumystaryna jobalyq-smetalyq jumystar (7 kezeń) ázirlene bastaldy.

Qazirgi tańda ekinshi kezeńge sáıkes jumystar júrgizilýde. Al, 1 kezeńde kórsetilgen kópir paıdalanýǵa berildi. Kópir qurylysy úsh kezeń boıynsha júrgizilip, 1 148 shaqyrym jol jóndeldi. Qaıta qurý jumystarynyń esebinen, apatty kópirdiń ornyna jańa kópir salynyp, eni 22 metrge ulǵaıdy.

Nátıjesinde kólik ótkizý qabileti 2 esege artty. Qurylys jumystaryn «JBI-S» JShS júrgizdi.