Shymkentte ájethanadan tabylǵan órtengen máıitke qatysty sot otyrysy bastaldy
ASTANA. QazAqparat - Ońtústik Qazaqstan oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda 34 jastaǵy azamatty óltirip, denesin ájethanaǵa tastaǵan kúdiktilerge qatysty alǵashqy sot otyrysy bastaldy. Sot alynda qoldaryn qańǵa bylǵaǵan Anton Bykov pen Igor Saratov jaýap berýde, dep habarlaıdy QazAqparat «tvk-uko» telearnasyna silteme jasap.
Jaýyzdyqpen óltirilgen 34 jastaǵy Denıstiń anasy Irına Berezınanyń aıtýynsha, spırttik ishimdikti tutynǵan azamattardyń biri balasynyń basynan kúrekpen ursa, ekinshisi tunshyqtyryp óltirgen.
«Men úıde bolatynmyn. Keshkisin maǵan balamnyń birge turatyn áıeli qońyraý shalyp, balam - Denısti belgisiz bireýlerdiń óltirip ketkenin aıtty. Eseńgiregen kúıi sol jaqqa qaraı bardym. Biraq, balamnyń máıithanada ekenin bildim. Negizinde, balam Saratovpen tanys bolatyn. Al Bykovpen tanys emes», - deıdi Irına Berezına.
Sottalýshylarǵa alqa bılerdiń qajettiligi bolmady. Sondyqtan, prokýror eki azamatqa taǵylǵan aıyppen tanystyrdy. Prokýrordyń sózine súıensek, Anton Bykov pen Igor Saratov bótelkelesteri Denısti qatygezdikpen óltirgen.
«Eki azamat máıitten qutylý úshin ony órtemek bolǵan. Deneniń lezde janyp ketpeıtindigin túsingen soń, uıyqtap qalǵan. Erteńgisine jábirlenýshiniń máıitin syrttaǵy ájethanaǵa basymen tastaǵan. Qazirgi tańda eki azamatqa da QR QK 99-baby, 2-bóligi, 2 jáne 7-tarmaqtary boıynsha aıyp taǵylýda», - dep atap ótti Qarataý aýdandyq prokýrorynyń orynbasary Maqsat Moshqalov.
Oqıǵa Qarataý aýdany Qyzylsaı eldi mekeninde 11 maýsym kúni bolǵan. Alkogoldi ishimdikke sylqııa toıǵan úsheý ózara sózge kelip, kerisip qalǵan. Saldarynan Denıs Botnarevty, qasyndaǵy eki bótelkelesi qastyqpen óltirgen. Jábirlenýshiniń denesin sottalýshy Igordiń anasy 15 maýsym kúni ájethanadan taýyp alǵan.
