Shymkentte Áz Naýryzdy toılaý bastaldy

ShYMKENT. QazAqparat - Shymkentte áz Naýryzdy toılaý bastalyp, «Seıil - Qoshqar ata» sharasy ótti. Qoshqar ata ózeniniń boıynda uıymdastyrylǵan festıvalde túrli ulttyq oıyndar uıymdastyrylyp, ulttyq taǵamdar daıyndaldy, dep habarlaıdy QazAqparat HAA tilshisi.

Kóktemniń basyn bulaq bastaýynan toılaý úrdisi Shym shaharda ótken jyldan beri jalǵasyn taýyp keledi. Búgingi «Seıil-Qoshqar ata» sharasynda Shym shahardyń turǵyndary seıil quryp, ulttyq taǵamdardan dám tatty. Qolónershiler kórmesin kórip, ózge ult ókilderiniń kontserttik baǵdarlamasyn tamashalady. Festıval aıasynda sondaı-aq kil myqty men kúsh atasyn eńsergen erler anyqtaldy. Asyl tuqymdy qoshqarlar men qoılar da tanystyrylyp, qoshqar kóterýden jarys uıymdastyryldy. Merekeniń kórki osy - salmaǵy 60 keliden astam qoshqardy kótergen palýandar saıysy boldy. Onda qoshqardy ıyǵyna san ret kóterip, qarsylastaryn san soqtyrǵan Akbar Elýbaıuly jeńimpaz bolyp tanyldy. Sozaqtyń serisi qoshqardy ıyǵyna 70 ret kóterip, bas báıgeni utyp aldy. Sharada ulttyq oıynnyń ózge de túrlerinen jarystar uıymdastyryldy. Boz kilemde beldeskender qazaqsha kúrestiń jeńimpazyn anyqtady. Toǵyzqumalaq, kir tasyn kóterýshiler de ózara myqtylardy moıyndatty. Qylqalam sheberleri de merekeniń kórkin keltirip, mezgil men merekeniń sulýlyǵyn sýretteýden synǵa tústi.