Shymkentte áıel adamdy qaǵyp óltirgen júrgizýshi izdestirilýde
ShYMKENT. QazAqparat - Búgin tańerteń Shymkentte jas kelinshekti kólik qaǵyp, mert boldy. Qaıǵyly oqıǵa qala ortalyǵyndaǵy Temirlan tasjolynda bolǵan, dep habarlaıdy QazAqparat HAA tilshisi.
Osy oqıǵaǵa qatysty málimetterden belgili bolǵanyndaı, búgin tańǵy saǵat 5.30-dar shamasynda 30-35-ter shamasyndaǵy áıeldi qaǵyp ketken júrgizýshi oqıǵa ornynan boı tasalaǵan. Jol boıynda jatqan kelinshekke jedel járdem qyzmetin ózge júrgizýshiler shaqyrtqan. Alaıda jaıaý júrginshi aýrýhanaǵa jetpeı jatyp kóz jumdy.
Oqıǵa ornyna jetken tártip saqshylary adamdy qaǵyp ketken kóliktiń synyqtaryn taýyp alǵan. Aldyn ala boljam boıynsha polıtseıler bul «Vaz-21014» kóligine tıesili bolýy múmkin degen boljam jasap otyr. Qazirgi tańda Qylmystyq kodekstiń eki birdeı baby boıynsha 345 - «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» jáne 347- «Jol-kólik oqıǵasy bolǵan jerden ketip qalý» áreketi boıynsha is qozǵaldy. Birneshe saraptamalar taǵaıyndalyp, tergeýge deıingi tekserý sharalary júrgizilýde. Sondaı-aq adam ólimine sebepker bolǵan júrgizýshige izdeý jarııalandy. Bul jumystar Jergilikti polıtsııa qyzmetine júktelip otyr.
