Shymkentte aıaldamalarda aıǵaılaıtyn kondýktorlarǵa shara qoldanylady
ShYMKENT. QazAqparat - Shymkent aıaldamalarynda avtobýs baǵytyn aıǵaılap habarlaıtyn kondýktorlarǵa shara qoldanylatyn bolady.
Bul týraly búgin arnaıy reıd júrgizgen jolaýshylar kóligi jáne avtomobıl joldary bóliminiń basshylyǵy málimdedi. Sebebi, qoǵamdyq kólikter toqtaıtyn oryndarda daýys kóterýge tyıym salynǵanyna qaramastan, kondýktorlar aıaldamany aıǵaılap habarlaý ádetin toqtatpaı otyr, dep habarlaıdy QazAqparat HAA tilshisi. 
Qala kóshelerinde reıd júrgizgen jolaýshylar kóligi jáne avtomobıl joldary bóliminiń qyzmetkerleri daýys kótergen kondýktorlardy beınekameraǵa jáne sýretke túsirip aldy. Aldaǵy eki apta kóleminde anyqtalǵan kemshilikter boıynsha shara qoldaný úshin materıaldar jolaýshylardy tasymaldaý kompanııalaryna joldanatyn bolady.
«Kondýktorlardy bosatý bizdiń quzyretimizge jatpaıdy. Sondyqtan jınaqtalǵan materıaldardy biz jergilikti kompanııalarǵa jiberemiz. Jumystan bosatady ma, álde basqalaı shara qoldanady ma - ony ózderi sheshedi. Ázirge anyqtaǵanymyz, kondýktorlar burynǵydaı aıǵaılaı bermeıdi. Máselen, 30 avtobýstyń tek bireýinde ǵana osyndaı jaǵdaılar kezdesti»,- deıdi qalalyq jolaýshylar kóligi jáne avtomobıl joldary bólimi basshysynyń orynbasary.
Sondaı-aq sala mamandary qoǵamdyq kólikterde tazalyq talaptary saqtalmaıtynyn, ondaǵy jazýlar men memlekettik tirkeý nómirleri kórinbeıtinin anyqtaǵan. Al keıbir júrgizýshiler avtobýstarǵa tyıym salynǵan sıgnaldar qoıyp alǵan. Endi zańbuzýshylyqqa jol bergenderge qatysty da kúres kúsheıtilmek. 
