Shymkentte avtosalonnan 28 mln teńgeniń kóligi urlandy
Naýryz aıynyń sońynda jergilikti avtosalonnyń ákimshiligi tekserý kezinde avtokólikterdiń biriniń joǵalǵanyn anyqtaǵan.
Shyǵyn somasy 28 mln teńgeni qurady. Oqıǵa týraly jumysshylar dereý polıtsııaǵa habarlady. Habarlama sotqa deıingi tergeýdiń biryńǵaı tizilimine QR QK-niń 200-baby (Avtomobıldi jymqyrý maqsatynsyz quqyqqa syıymsyz ıelenip alý) boıynsha tirkeldi.
Polıtseıler kólikti aıdap ketken adamdy anyqtaý maqsatynda birqatar jedel is-sharalar ótkizdi. Krımınaldyq polıtsııa qyzmetkerleri avtosalon qyzmetkerlerin jaýap aldy. Jedel basqarý ortalyǵynyń ınspektorlary kóshelerdiń boıynda ornatylǵan beınebaqylaý kameralaryn tekserdi. Nátıjesinde, tártip saqshylary eki saǵat ishinde Báıdibek bı kóshesinde urlanǵan avtokólikti anyqtady.
Bul týraly jedel túrde polıtsııaǵa habarlandy. Kólikti zańsyz ıelengen azamat ustaldy. Avtokólik salonǵa qaıtaryldy. Qazirgi tańda is aıyptaý aktisimen sotqa joldandy.
Aıta keteıik, Qylmystyq kodekske sáıkes osy qylmystyq áreketti istegen adam 1000 AEK-ke deıingi mólsherde aıyppul tóleıdi nemese sol mólsherde túzeý jumystaryna jegiledi. Sondaı-aq 600 saǵatqa deıingi merzimge qoǵamdyq jumystarǵa tartylýy múmkin, 2 jylǵa deıingi merzimge bas bostandyǵy shektelip, sol merzimge bas bostandyǵynan aıyrylýy da múmkin.