Shymkentte avtokólikterdi aýladan urlap júrgen eki kúdikti ustaldy
ShYMKENT. QazAqparat - Shymkentte avtokólikterdi aýladan urlap júrgen eki kúdikti ustaldy. Qazirgi tańda seziktilerdiń 3 kólikti aıdap ketý jaıtyna qatysy bary dáleldenip otyr, dep habarlaıdy QazAqparat HAA tilshisi.
Jedel-izdestirý sharasyn júrgizý barysynda ustalǵan eki kúdikti 1994 jáne 1996 jyly týǵan qala turǵyndary bolyp shyqty. Ekeýi de jumyssyz. Olardan jaýap alý barysynda kólikterdi negizinen kópqabatty úılerdiń aýlasynan urlap júrgenderi anyqtaldy. Eń aldymen «Sever» shaǵyn aýdanynda 44 jastaǵy azamattyń «Opel» markaly avtokóligin uqsas kiltpen ashyp, zańsyz aıdap ketken. Keıinnen ony satyp, aqshasyn óz qajettilikterine jaratypty. Ońaı jerden oljaly bolǵandar taǵy eki kólikti urlap, satyp jibergen.
Jábirlenýshilerge keltirilgen jalpy shyǵyn kólemi 2 mıllıon teńgege jýyqtaıdy. Qazir kúdiktiler ýaqytsha tergeý abaqtysyna qamaýǵa alynyp, olarǵa qatysty Qylmystyq kodekstiń 200 baby «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» áreketi boıynsha is qozǵaldy. Aıǵaqty zat retinde urlanǵan bir avtokólik tárkilenip, sotqa deıingi tergeý amaldary júrgizilýde.
