Shymkentte avtobýs júrgizýshisine kúsh kórsetkenderge qylmystyq is qozǵaldy
Áleýmettik jelide taraǵan vıdeodan belgisiz azamattardyń qoǵamdyq kólik júrgizýshisine kúsh qoldanǵanyn kórýge bolady. Jeńil kólikten túsken eki azamat aıaldamaǵa toqtaǵan avtobýsqa kirip, júrgizýshisin soqqyǵa jyqqan. Betinen uryp, murnyn qanatqan. Sondaı-aq, arasha túsken kondýktordy da qýalap júrip urǵan.
Shymkent qalalyq polıtsııa departamentiniń baspasóz qyzmeti atalǵan máselege qatysty sotqa deıingi tergep-tekserý amaldary júrgizilip jatqanyn málimdedi.
«Atalǵan jaıt boıynsha Abaı aýdanynyń polıtsııa basqarmasyna QR QK-niń 293-babymen «buzaqylyq» qylmystyq isi tirkelgen. Іs boıynsha jábirlenýshige sot-medıtsınalyq saraptama taǵaıyndaldy. Qazirgi tańda sotqa deıingi tergep-tekserý amaldary júrgizilip jatyr» - delingen habarlamada.
Al, avtobýs júrgizýshisiniń jubaıy beıneúndeý jasap, mán-jaıdy baıandady. Polıtsııadan isti sozbaı, tezirek sheship berýin surady.
«Meniń kúıeýim «Radýga» JShS qarasty 60 avtobýstyń júrgizýshisi. «Elektron» aıaldamasyna toqtaǵanda belgisiz azamattar kúıeýimmen birge kondýktordy da soqqyǵa jyqqan. Biz polıtsııaǵa aryz berip qoıdyq. Endi istiń sozylmaı, tezirek sheshim shyǵarylýyn ótinemin» - deıdi ol.
Jelidegi jazbaǵa oqyrmandar da túrli pikirler jazyp jatyr. Olardyń ishinde, «Qoǵamdyq kóliktiń júrgizýshisin uryp-soqqandardy qatań jazalaý kerek», «Kondýktor erkek eken, ekeýine bas saldy. Іshtegi júrgizýshi shyǵyp kondýktoryna kómektespeı ma, taıaq jep otyr ǵoı mandraj bolyp», «Judyryqpen júgirgender sumdyq. Masqara», «Erkek emes ezder eken, alpys jasar adamdy jabylyp uryp. Qıt etse judyryq ala júgiredi osy jabaıylar», «Ne bolyp ketti, o toba? Qaıta qoǵamdyq kólikke jol berý kerek qoı, ishinde qanshama adam otyr. Balaly analar, qart kisiler, múgedek kisiler otyr» degen pikirler bar.
Vıdeodan alynǵan kadr