Shymkentte aýyr halde aýrýhanaǵa túsken 86 jastaǵy qarııa koronavırýstan jazylyp shyqty

ShYMKENT. QazAqparat - Shymkentte aýyr halde aýrýhanaǵa túsken 86 jastaǵy qarııa koronavırýstan jazylyp shyqty. Jalǵas Sýlaımanov esimdi qarııa 21 aqpan kúni aýyr halde juqpaly aýrýlar aýrýhanasyna túsken bolatyn, dep habarlaıdy QazAqparat tilshisi.

Dárigerler kompıýterlik tomografııanyń kómegimen juqpaly dert juqtyrǵan qart kisiniń ókpe tininiń 80% zaqymdanǵanyn anyqtaǵan. Medıtsına mamandary naýqasty tez arada jansaqtaý bólimine jatqyzyp, jasandy tynys alý apparatyna qosqan. Vırýsqa qarsy júrgizilgen terapııalyq emniń nátıjesinde zeınetkerdiń jaǵdaıy jaqsaryp, 4 naýryzda jasandy tynys alý aparatynan alyndy.

«Naýqas aýrýhanaǵa KVI ınfektsııanyń aýyr dárejesimen tústi. Zeınetkerge antıkogýlıantty, gormonaldi, oksıgenoterapııa emderi júrgizildi. Dertinen saýyqqan qart kisi endi úıine shyǵarylady»,-deıdi juqpaly aýrýlar ortalyǵynyń dárigeri Marlan Qýanyshbekuly.

Al, bilikti dárigerlerdiń eńbegine qarııanyń alǵysy sheksiz. Ol aq halattylarǵa alǵysyn aq batamen jetkizdi.