Shymkentte aýrýhanadan 500 myń teńge bopsalaǵysy kelgen bloger ustaldy

ShYMKENT. QazAqparat - Shymkentte medıtsınalyq mekemeden 500 myń teńge bopsalamaq bolǵan kúdikti ustaldy. Qazirgi tańda ol sot sheshimimen qamaýǵa alynyp, sotqa deıingi tergeý amaldary júrip jatyr, dep habarlaıdy QazAqparat tilshisi.

Kúni keshe áleýmettik jelilerde blogerdiń aqsha bopsalap, ustalǵany týraly aqparat taraǵan edi.

Búgin osyǵan qatysty qalalyq polıtsııa departamenti resmı málimet jarııa etti.

Tártip saqshylarynyń aıtýynsha, Shymkent qalalyq krımınaldyq polıtsııasyna sheneýnik shaǵymdanǵan. Ol qaladaǵy emhanalardyń biriniń dárigerlerinen áldebireýler aqsha talap etkenin jetkizdi.

«Er adamnyń aıtýynsha, ózin bloger dep tanystyrǵan birneshe adam odan jarty mıllıon teńge kóleminde aqsha bopsalaǵan. Óz kezeginde olar ákimshilik ǵımaratta memlekettik tý jyrtylǵan beınejazbany taratpaýǵa ýáde etken. Atalǵan jaıtty polıtsııa qyzmetkerleri QR QK 194-baby «Bopsalaý» boıynsha tirkedi. Sondaı-aq, krımınaldyq polıtsııa qyzmetkerleri barlyq qajetti jedel sharalardy qabyldap, izdestirý jumystaryn júrgizdi. Nátıjesinde kúdikti qylmys ústinde qolǵa tústi. Kúdikti azamatty ustaý barysynda onyń Toyota Camry markaly avtokóliginen 300 000 teńge kólemindegi aqsha tárkilendi» delingen Shymkent qalalyq PD habarlamasynda.

Qazirgi tańda ustalǵan azamatqa qatysty sotqa deıingi tergeý amaldary júrgizilip jatyr. Tergeýshiler oqıǵaǵa qatysty barlyq mán-jaıdy anyqtaý ústinde.