Shymkentte aýladaǵy qudyqqa túsip ketken búldirshinniń jaǵdaıy óte aýyr
ShYMKENT. QazAqparat - Shymkentte aýladaǵy qudyqqa túsip ketken búldirshinniń jaǵdaıy óte aýyr kúıinde qalyp otyr. Bul týraly oblystyq balalar aýrýhanasy bas dárigeriniń orynbasary Bolat Nusqabaev málimdedi, dep habarlaıdy QazAqparat tilshisi.
Bolat Nusqabaevtyń aıtýynsha, 1 jas 8 aılyq Beksultan Seıit qazir jansaqtaý bóliminde es-tússiz jatyr. Las sýdy mólsherden tys jutyp qoıǵan balanyń ókpesi istemegendikten, jasandy demalý apparatyna qosylypty. Dárigerler ázirge qandaıda ba bir boljam aıtý qıyndaý dep otyr. Sebebi, búldirshinniń beti beri qaramaı, óte aýyr kúıinde qalyp otyr eken. Endi tek kútemiz degendi aıtady.
Aıta keteıik, keleńsiz jaǵdaı qalanyń Joǵary Otyrar shaǵyn aýdanynda bolǵan. Kópqabatty turǵyn úıdiń aýlasynda oınap júrgen Beksultan tal túste jylý qubyrlary tartylǵan qudyqqa túsip ketken. Nátıjesinde 1,5 metr tereńdiktegi sýda birshama ýaqyt tunshyqqan. Qaldyq sýǵa tunshyqqan sábı qazir aýrýhanada jansaqtaý bóliminde jatyr.
Jergilikti turǵyndar bolsa «Qýatjylý ortalyǵyna» qarasty qudyqqa osymen tórtinshi balanyń túsip ketkenin aıtady. Osy máseleni aıtyp olar quzyrly mekemelerge aryzdanǵanymen, nátıje shyqpapty. Tek kezekti ret bala qulap, ólim aýzynda jatqan soń ǵana shuńqyrdy jaýap ketipti. Soǵan qaramastan kópqabatty úıdiń turǵyndary Bas prokýratýraǵa deıin hat jazyp, ákimdik pen kommýnaldyq qyzmetterdi teksertemiz dep bekinip otyr.
