Shymkentte aýǵan soǵysynda qaza tapqan jaýyngerdiń anasyna baspana berildi
ShYMKENT. QazAqparat - Shymkentte aýǵan soǵysynda mert bolǵan jaýyngerdiń anasyna baspana berildi. 35 jyl buryn 18 jastaǵy ulyn soǵysqa attandyryp keıin, qaıta kóre almaǵan anaǵa 2 bólmeli páter buıyrdy, dep habarlaıdy QazAqparat tilshisi.
Jat jerde kóz jumǵan Ábdirahman Gúlshara apaıdyń uldan tuńǵyshy edi. Ol áskerge joǵary bilim alyp júrgen jerinen attanady. Keıin áskerı boryshyn ótep júrip aýǵan jerindegi urystarǵa qatysqan. Sóıtip, jaralanǵan jaýyngerdi qutqarý kezinde ózi oqqa ushyp, jan tapsyrady. Búginde batyr uldyń erligi jaıly estelikter kóp. Onyń batyldyǵy jaıly sýretter de syr shertetindeı. Endi mine sol erligi bılik tarapynan da baǵalanyp otyr. Ábdirahmannyń artynda aman qalǵan anasy men baýyryna eki bólmeli páter berilip otyr. Baspana sýretine qaraǵanda qabyrǵasy qaıysyp, ulynyń esimin esine alǵanda eziletin ananyń kóńiline jubanysh boldy.
«2006 jyly balamnyń atynan kezekke turdym. Sebebi, osy kúnge deıin páter jaldap júrgen edik. Endi mine baspanaly bolyp qýanyp jatyrmyz. Araǵa 35 jyl salyp qaza tapqan balamnyń rýhyna kórsetilgen izet bolǵandaı bul»,- deıdi Gúlshara Jumalıeva.
Búginde óńirde aýǵan soǵysyna qatysyp, qaza tapqan 96 jaýyngerdiń otbasy bar. Odan bólek 100-ge jýyq ardager baspana kezeginde tur. Olar 10 jyldaı ýaqyttan beri kezegin kútip keledi.
«Bul kezek 4-5 jyldyń kóleminde jyljı bastady. Shymkentte úıler salyna bastaǵannan toqtap qalǵan osy aýǵan soǵysy ardagerleriniń kezegi kelip jatyr. Oǵan ardagerler atynan alǵysymyzdy aıtamyz», - deıdi Oblystyq aýǵan jáne jergilikti soǵyn ardagerleri odaǵynyń tóraǵasy.
