Shymkentte attraktsıonnan qulap ketken 20 jastaǵy jigittiń jaǵdaıy aýyr
Qalalyq densaýlyq basqarmasy baspasóz qyzmetiniń málimetinshe, keshe 10-shy sáýir kúni qaladaǵy saıabaqtardyń birinen 103 qyzmetine er adamnyń bıikten qulap ketkeni týraly shaqyrtý túsken.
Oqıǵa ornyna jetken jedel járdem qyzmetkerleri 20 jastaǵy jigittiń aýyr jaraqat alǵanyn anyqtaǵan.
«Oqıǵa ornyna barǵan jedel járdem qyzmetkerleri naýqasqa alǵashqy medıtsınalyq kómek kórsetip, №1 qalalyq klınıkalyq aýrýhanaǵa jetkizdi. Medıtsınalyq tekserý barysynda patsıenttiń bas súıek mańdaıy jaraqattanǵany anyqtalyp, operatsııa jasaldy. Naýqastyń jaǵdaıy aýyr, jansaqtaý bóliminde jatyr» delingen basqarmanyń habarlamasynda.
Qazir oqıǵanyń mán-jaıyn qalalyq polıtsııa qyzmetkerleri anyqtap jatyr.
«Báıdibek bı kóshesindegi attraktsıondar saıabaǵyndaǵy jaıt boıynsha ál-Farabı aýdany polıtsııa basqarmasynyń qyzmetkerleri QR QK 306-babynyń 1-bóligimen qylmystyq is tirkedi. Qazirgi tańda sotqa deıingi tergep-tekserý jumystary júrip jatyr. Onyń barysynda jaıttyń búkil egjeı-tegjeıi anyqtalady» delingen polıtsııanyń baspasóz qyzmeti taratqan habarlamada.