Shymkentte ata-analardyń respýblıkalyq konferentsııasy ótti
Atalǵan shara QR Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııanyń, Shymkent qalasy ákimdiginiń, «Nur Otan» partııasy men «Bi Juldyzaı» korporatıvtik qorynynyń qoldaýymen jáne Qazaqstandaǵy mektepke deıingi mekemeler qaýymdastyǵynyń bastamasymen uıymdastyryldy.
«Nur Otan» partııasynyń «Kedergisiz keleshek» baǵdarlamasy aıasynda ótken sharaǵa múmkindigi shekteýli balalardyń ata-analary men QR Bilim jáne ǵylym mınıstrliginiń, Túrkistan, Jambyl jáne Qyzylorda oblystarynyń, sondaı-aq qaıyrymdylyqpen aınalysatyn úkimettik emes uıymdardyń ókilderi de qatysty. Shymkentte alǵash ret ótkizilgen jıynda qala ákimi Ǵabıdolla Ábdirahymov sóz sóılep, bastamanyń mańyzdylyǵyn atap ótti. Sonymen qatar shara barysynda ata-analardy, tabysty eńbek etip júrgen ÚEU ókilderin arnaıy alǵys hattarmen jáne dıplomdarmen marapattady.
«Mańyzdy ic-sharaǵa bárimiz atsalysýymyz qajet. Bul - úlken bastama. Alaıda, qoǵam tarapynan áli de jetkilikti kóńil bólinbeı keledi. Bul baǵyttaǵy kez kelgen bastamany qoldaımyz. Jumystaryńyzǵa sáttilik tileımin», - dedi qala ákimi.
Konferentsııada jas urpaqty áleýmettendirý men rýhanı, moraldyq jáne pozıtıvti oılaýdy qalyptastyrý, ol úshin úkimettik emes uıym músheleri men ata-analardyń kúsh-jigerin biriktirý máseleleri sóz boldy.
Sondaı-aq, shara aıasynda qalada «Asyl bala» zııatkerlik-ınklıýzıvtik ortalyǵy ashyldy.