Shymkentte ata-analardyń 30 paıyzǵa jýyǵy oqýlyqty óz qarajattaryna alady
ShYMKENT. QazAqparat - Shymkenttik oqýshylardy kitappen qamtamasyz etýge qazynadan 1 mlrd 300 mln teńge jumsalady. Sóıtip, bıylǵy oqý jylynda 2,5 jáne 7-shi synyp oqýshylaryna 100 paıyz kitap beriledi. Bul týraly Shymkent qalalyq bilim bóliminiń basshysy Janat Tájıeva málimdedi, dep habarlaıdy QazAqparat HAA tilshisi.
Bólim basshysynyń aıtýynsha, qazir 12 baspamen kelisim-shart túzilip, 12 jyldyq bilim baǵdarlamasy sheńberinde 1 mln. 4 myń 849 dana oqýlyqqa tapsyrys berilgen. Sondaı-aq, 4-shi synyptyń aǵylshyn jáne 9-shy synyptyń «Zaıyrly etıka jáne dintaný negizderi» kitaby qaıta basylyp shyqty. Dese de jyl saıyn mektep oqýshylarynyń sany orta eseppen 8000-ǵa artýyna baılanysty oqýlyq jetispeýshiligi týyndaýy múmkin. Sondyqtan ata-analardyń 30 paıyzǵa jýyǵy oqýlyqty óz qarajatyna alyp berýine týra keledi.
«Bizde oqýlyq máselesi ata-analar tarapynan túsinispeýshilik týǵyzýda. Kóbine 100 paıyz oqýlyqpen qamtylady delinedi. Degenmen bıyl 1,8-shi synyptyń oqýshylary ǵana mektepten kitaptardy tolyq tegin alady. Al, qalǵandary az qamtamasyz etilgen, kópbalaly otbasynan shyqqan balalarǵa úlestiriledi. Taǵy bir bóligi saýda oryndarynan satyp alatyn bolady. Sondaı-aq bilim berýdi damytý baǵdarlamasy negizinde ár jyly kezeń kezeńimen oqýlyqtar jańartylady»,-deıdi Shymkent qalalyq bilim bóliminiń basshysy Janat Tájıeva.
Oqýlyqtardy kelisimshart negizinde «Qazposhta» aktsıonerlik qoǵamy tasymaldaıdy. Mekeme tamyz aıynyń 25-ine deıin qaladaǵy 128 mektepke kitaptardy jetkizip úlgerýi tıis. Al, qalǵan synyp oqýlyqtaryn 100 paıyz qamtamasyz etý keler jyldarǵa josparlanýda.
Jalpy, sala mamandarynyń sózinshe, Qazaqstan 12 jyldyq bilim berý júıesine 2019-2020 jyldary tolyq kóshedi. Alpaýyt elderdiń tájirıbesi eldi osy mejege umtyldyrady. Bul reforma qazaqstandyq oqýshylardyń jańa tehnologııany ıgerip, dúnıejúzin moıyndatýyna septigin tıgizbek.
