Shymkentte astyrtyn tsehtan 25 myń shólmek alkogol men 15 tonna spırt tabyldy

ShYMKENT. QazAqparat - Shymkent qalasynda 25 myńnan astam jalǵan alkogol shólmekteri tárkilendi, dep habarlaıdy QazAqparat Qarjy monıtorıngi komıtetine silteme jasap.

Shymkent qalasy boıynsha Ekonomıkalyq tergeý departamentiniń qyzmetkerleri júrgizgen jedel-izdestirý barysynda sýrrogattyq alkogol ónimderin daıyndaýmen aınalysatyn astyrtyn tsehtyń qyzmetine tosqaýyl qoıyldy.

«Oqıǵa ornyn qarap-tekserý kezinde 25 myńnan astam shólmek «Pshenıchnaıa», «Moskovskaıa», «Medovaıa» jáne «Rýsskaıa krepost» markaly alkogol ónimderi tárkilendi. Sonymen qosa, 15 tonna spırt, 1 mln astam kórineý jalǵan esepke alý-baqylaý markalary, shólmekterdi jabýǵa arnalǵan qural-jabdyqtar, 52 myńnan astam bos shólmek, 200 myń dana alkogol ónimderin qaptaýǵa arnalǵan qorap, 100 myń dana kóleminde qaqpaqtar jáne 1,9 mln teńge aqsha qarajaty alyndy» delingen habarlamada.

Osy derekke qatysty QR QK 233-babynyń 2-bóligi boıynsha sotqa deıingi tergep-tekserý sharalary bastaldy. Qazirgi ýaqytta qylmystyq is uıymdastyrýshylary anyqtaldy, tıisti saraptamalar men tergeý amaldary júrgizilýde.

2019 jyldyń basynan beri Qarjy monıtorıngi komıteti jalǵan alkogol ónimderin daıyndaıtyn 31 astyrtyn tsehtyń jolyn kesti.

Nátıjesinde, kóleńkeli aınalymnan jalpy somasy 1,5 mlrd teńgeni quraıtyn 200 myń lıtr spırt pen 1 mln astam jalǵan alkogol shólmegi qoldanystan shyǵaryldy.

Dúnıejúzilik densaýlyq saqtaý uıymynyń málimeti boıynsha jyl saıyn álemde sapasyz alkogol ónimderi 3 mln astam adamnyń ómirin qııady.