Shymkentte «Astana» jańa shaǵynaýdany ashyldy
Elbasynyń bastamasymen ashylǵan «Astana» shaǵynaýdany megapolıstiń ortalyǵynda - ákimshilik-iskerlik ortalyqta ornalasqan.
Nysannyń saltanatty ashylý rásimine oblys ákimi Janseıit Túımebaev pen qala ákimi Nurlan Saýranbaev qatysyp, kópshilik qaýymǵa arnaıy quttyqtaý lebizin jetkizdi.
Turǵyndardyń jaılylyǵy úshin munda shaǵynaýdanmen attas skver salyndy. Jańa skverdiń jalpy aýmaǵy 1 gektarǵa jýyq. Gúl baǵy túrli tuqymdas aǵashtarmen - shynar, kashtan, qaıyń jáne túrli-tústi gúldermen kómkerilip, kishi sáýlettik beıneler qoıylǵan.
Balalardyń oıyn alańqaıy da aýmaqtyń kelbetin ashyp tur.
Sonymen qatar, bul kúni gúl baǵy mańynan boı kótergen kópqabatty turǵyn úılerden 15 januıaǵa páter kilti tabys etildi.
Ákimshilik-iskerlik ortalyq aýmaǵynda barlyǵy 90 myń sharshy metr turǵyn úı paıdalanýǵa berildi. Sondaı-aq, 27 kópqabatty úıdiń qurylysy júrip jatyr.
