Shymkentte áskerı qyzmetshilerdiń balalary ózara saıysqa tústi
Jarys Elbasynyń mektepterde áskerı-patrıottyq tárbıe berýdiń rólin kúsheıtý týraly tapsyrmasyn iske asyrý sheńberinde, sondaı-aq salaýatty ómir saltyn nasıhattaý, óskeleń urpaq arasynda buqaralyq sportty damytý maqsatynda ótti.
Sport sektsııalarynyń tárbıelenýshileri Shymkent garnızonynyń Armııa ortalyq sport klýby kesheniniń bazasynda jeńil atletıkadan saıysqa tústi. 70-ten asa bala ózderiniń kúshterin, tózimdilikterin, jyldamdyqtary men shapshańdylyǵyn pash etti. Jarys qyzý ári tartysty ótti.
Qorytyndysynda, «Jas ulan» komandasynyń qatysýshylary jeńimpaz atansa, ekinshi jáne úshinshi oryndardy «Moto- atqyshtar» jáne «Yntymaq» komandalary sáıkesinshe ıelendi.
Esterińizge sala ketsek, byltyrǵy jyldyń basynan Qorǵanys mınıstrligi basshylyǵynyń qoldaýymen Sport komıteti - AOSK Qazaqstan Qarýly Kúshteri áskerı qyzmetshileriniń balalary úshin sport sektsııalaryn ashty. Búgingi tańda 6 men 16 jas aralyǵyndaǵy 750-den asa bala kásibı túrde fýtbol, qazaq kúresi, boks, taekvondo, ústel tennısi, armııalyq qoıan-qoltyq urys jáne sporttyń ózge de túrlerimen shuǵyldanady.
