Shymkentte áskerge shaqyrýshylarǵa tapsyrys 40 paıyzǵa artqan
Ol «Shymkent qalasy boıynsha Qazaqstan Respýblıkasynyń Qarýly kúshterine, basqa da áskerleri men áskerı qurylymdaryna azamattardy merzimdi áskerı qyzmetke shaqyrýdy uıymdastyrý jáne júrgizý» taqyrybynda jasaǵan baıandamasynda 2019 jyldan beri áskerge shaqyrýshylar sany 40 paıyzǵa artqanyn jetkizdi.
Qazaqstan Respýblıkasy Qarýly kúshteri Bas shtaby Uıymdastyrý-jumyldyrý jumystary departamenti bastyǵynyń orynbasary polkovnık Rýstam Aqbarovtyń jetekshiligimen Shymkent qalasyndaǵy jergilikti áskerı basqarý organdarynyń basshylyq quramyna «Kúzgi áskerge shaqyrý naýqanyn uıymdastyrý men ótkizý» taqyrybynda oqý-ádistemelik jıyn ótti.
Jıynǵa qala ákiminiń orynbasary – qalalyq shaqyrý komıssııasynyń tóraǵasy Shyńǵys Muqan, Shymkent garnızonynyń áskerı prokýrory ádilet polkovnıgi Baǵlan Teleý jáne basqa da áskerge shaqyrý jumystaryn uıymdastyrýǵa jaýapty tulǵalar qatysty.
Jıyn barysynda Shymkent qalasynyń qorǵanys isteri jónindegi departamentiniń bastyǵy polkovnık Almaz Tileýhanov kóktemgi áskerge shaqyrý kezeńiniń qorytyndysyn shyǵaryp, kúzgi naýqanǵa arnalǵan jumystar men josparlary týraly baıandady.
Qorǵanys departamenti bastyǵynyń aıtýynsha, azamattardy merzimdi áskerı qyzmetke shaqyrý jospary 2021 jylmen salystyrǵanda 72 adamǵa artqan.
«Shymkent qalasynyń qorǵanys isteri jónindegi departamenti 2019 jyly qurylǵan sátte azamattardy merzimdi áskerı qyzmetke shaqyrý jospary 1 jylǵa 1200 jýyq balany quraıtyn, al qazirgi tańda 2022 jylǵy kóktem-kúz áskerge shaqyrý jospary 1600 jýyq azamatty qamtıdy. Qaladan kóktemgi shaqyrýǵa berilgen tapsyrys artyǵymen – 103%-ǵa oryndaldy. Atap aıtsaq, Qarýly kúshter qataryna 16 adam, Ulttyq ulanǵa 9 adam berilgen tapsyrystan artyq jiberildi. Kúzgi áskerge shaqyrý josparyna sáıkes, qaladan barlyǵy 800-ge jýyq adam shaqyrylmaq. Bul jospardy sapaly oryndaý úshin 6 myńnan astam azamatty zerdeleý kerek. Búginde qala boıynsha 3 myńnan astam azamat zerdelenip, onyń 300-ge jýyǵy iriktelip, jeke isteri tolyqtyrylýda», – dedi polkovnık Almaz Tileýhanov.
Sondaı-aq, jıyn barysynda Prezıdent Joldaýy da talqylandy.
Qorǵanys mınıstrliginen kelgen ofıtserler quramy «Sybaılas jemqorlyqqa qarsy kúres» týraly tarmaqqa naqtyraq toktaldy. Bul jolda Shymkent garnızony áskerı polıtsııa bóliminiń aǵa ofıtseri kapıtan Erbol Aıtbaev pen «QR Sybaılas jemqorlyqqa qarsy is-qımyl agenttigi Shymkent qalasy boıynsha departamentiniń ókili Jazıra Áljanova sybaılas jemqorlyqty týdyratyn sebepter men jaǵdaılardy joıý týraly negizgi baǵyttarǵa toqtalyp, jemqorlyqqa qarsy kúres keshendi negizde, ıaǵnı memlekettik organdar men azamattardyń tyǵyz qarym-qatynasynda júzege asyrylýy kerek ekenin atap ótti»,-delingen Shymkent garnızonynyń baspasóz qyzmeti tartqan aqparatta.
