Shymkentte «Asqaqtaı ber, Astana!» saltanatty sharasy ótti
«Barshańyzdy Astana kúnimen shyn júrekten quttyqtaımyn! Elbasymyz Nursultan Ábishuly Nazarbaev osydan 23 jyl buryn ıaǵnı 1994 jyldyń 6 shildesinde Joǵarǵy Keńestiń otyrysynda astanany aýystyrý jónindegi óte mańyzdy bastamany kótergen bolatyn. Táýelsizdiktiń alǵashqy jyldaryndaǵy qıyndyqty bastan keship jatqandyqtan árıne, jalpy qoǵam bul ıdeıany tolyq qoldaı almady. Elbasymyz tabandy saıasatkerge tán minezben memleket taǵdyryndaǵy tańdaýly sátte taısalmaı, barlyǵyn sendire bildi. Prezıdentimizdiń kóregendiligin dál búgingi ýaqyt aına-qatesiz kórsetip tur», - dedi Janseıit Túımebaev.
Munan soń oblys ákimi birqatar azamattyń omyraýyna «Oblysqa sińirgen eńbegi úshin» tósbelgisin taqty. Marapattalǵandardyń qatarynda Ońtústik Qazaqstan oblysy qorǵanys ister jónindegi departamentiniń basshysy Talǵat Áliqulov, Ońtústik Qazaqstan oblystyq sotynyń tóraǵasy Talǵat Baratbekov, Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alı Kómekbaev jáne basqa da azamattar bar. 
Іs-shara sońy merekelik kontserttik baǵdarlamaǵa ulasty. Astana kúnine arnalǵan «Arnaý» kompozıtsııasy shyrqaldy. Qazaqtyń tarıhynan syr shertetin Q.Ahmedııarovtyń «Elbasy», Qurmanǵazynyń «Saryarqa» kúılerin «Súgir» atyndaǵy qazaq ult aspaptar orkestri oryndady. J.Shanın atyndaǵy oblystyq akademııalyq qazaq drama teatry men oblystyq ázil-syqaq teatry ártisteriniń oryndaýynda «Ata-baba amanaty» teatrlandyrylǵan qoıylymy kórsetildi.
«Dala danalyǵy» bıin myń buralǵan bıshiler - «Qazyna» bı ansambli oryndap, «Tumar» folklorlyq ansambliniń súıemeldeýimen Qarakóz Abdýsharıpova, Óserbaı Bórihanov, Turar Álmenov, Altynaı Ákim, Baǵdat Seıitbekovter Elbasynyń súıikti ánderinen popýrrı shyrqap, №2 Saz mektebi jáne qalalyq balalar men jasóspirimder ortalyǵy oqýshylarynyń «Asqaqtaı ber, Astana!» poetıkalyq-sazdy kompozıtsııasyna ulasady. Sońynda, is-shara qatysýshylary N.Nazarbaevtyń sózine jazylǵan B.Tileýhannyń «Elim meniń» ánin áýeletti.
