Shymkentte asa iri mólsherde sıntetıkalyq esirtki taratyp kelgen jas jigit ustaldy

ShYMKENT. QazAqparat - Shymkentte asa iri mólsherde sıntetıkalyq esirtki taratyp kelgen 26 jastaǵy turǵyn ustaldy, dep habarlaıdy QazAqparat tilshisi.

Tergeý barysynda kúdiktiniń ońaı aqsha tabý maqsatynda áleýmettik jeli arqyly esirtki kýreri bolyp jumysqa ornalasqany belgili boldy.

Keıinnen jumysyn jaqsy atqarǵany úshin «kóterme-saýdager» deńgeıine kóterilip, shaǵyn mólsherden iri jáne asa iri mólsherde sıntetıkalyq esirtki taratýǵa kóshken.

Sosyn ony tutynýshylarǵa jetkizý maqsatynda saqtap, tasymaldap, jasyryn oryndarǵa tyǵyp kelgen.

Kúdikti avtokóligimen kezekti esirtki zattaryn taratýǵa shyqqan sátte qolǵa tústi.

Kóliktiń aldyńǵy oryndyǵynyń astyna tyǵylǵan sómkesinen 7 dana japsyrmaǵa oralǵan sıntetıkalyq esirtki tárkilenip alyndy.

Sonymen qatar, ol tyǵyp úlgergen jerlerden taǵy qosymsha 2 dana japsyrmaǵa oralǵan 30 dana sym qabyqshalaryna salynǵan sıntetıkalyq esirtki tabyldy.

Turǵylyqty mekenjaıy boıynsha tekserý jumystaryn júrgizý kezinde bólshektep taratýǵa arnalǵan eki dana esirtki alyndy.

«Shymkent qalasy polıtsııa departamenti esirtki qylmysyna qarsy is-qımyl basqarmasynyń qyzmetkerlerimen «Qarasora-2022» jedel-profılaktıkalyq is-sharasy qarqyndy júrip jatyr. Kezekti is-shara barysynda qala aýmaǵynda asa iri mólsherde sıntetıkalyq esirtkilerdi taratýmen aınalysqan 26 jastaǵy turǵyn ustaldy. Saraptama qorytyndysyna sáıkes, tárkilengen sıntetıkalyq esirtkiniń jalpy salmaǵy - 150 gramnan asady. Búginde atalǵan azamatqa qatysty QK 296-babynyń 4-bóligimen qylmystyq is qozǵalyp, sotqa deıingi tergep-tekserý bastaldy. Kúdikti ýaqytsha ustaý ızolıatoryna qamaýǵa alyndy» - delingen Shymkent qalasy polıtsııa departamentiniń baspasóz qyzmeti taratan aqparatta.