Shymkentte «Araı-2017» baıqaýynyń aqtyq syny ótedi
ASTANA. QazAqparat - Búgin Ońtústik Qazaqstan oblysynda «Araı-2017» jas estrada ánshileri jáne mádenı is-shara júrgizýshileri baıqaýynyń aqtyq kezeńi ótpek. Kil myqtylardy anyqtaıtyn dástúrli baıqaý oblystyq mádenıet jáne halyq shyǵarmashylyǵy ortalyǵynyń uıymdastyrýymen 21-shi ret ótkizilgeli otyr. Bul týraly OQO aımaqtyq kommýnıkatsııalar qyzmetinde ótken baspasóz máslıhatynda aıtyldy.
Baıqaýdyń maqsaty - Ońtústik óńirinen shyqqan jas daryndardy iriktep, olardyń talanttaryn shyńdaý. Jańasha úlgidegi estrada ánderin ómirge ákelýmen qatar olardy dáripteýge serpin beretin «Araı» baıqaýyna talpynǵan úmitkerler sany da jyldan jylǵa artyp keledi. Byrtyrǵy jyly baıqaýǵa qatysýǵa 293 úmitker ótinish bildirse, bıyl 512 úmitker irikteý kezeńinen ótipti.
Respýblıkaǵa aty málim baıqaýdyń aqtyq synynda qazylyq jasaý qazaq estradasynyń juldyzy ánshi, jerlesimiz Shahızada Baıtpatshanovaǵa senip tapsyrylypty.
«Araı -2017» baıqaýynyń mańyzdylyǵy erekshe. Munda Ońtústik óńirinen iriktelip alynǵan talant ıeleri baq synaıdy. Qazylyq jasaý maǵan senip tapsyrylǵandyqtan naǵyz daryndy, naǵyz talantqa ǵana qoldaý bildiremin. Óner saıysynda naǵyz talanttyǵa tusaý joq»,- deıdi Shahızada Baıpatshanova.
Bıylǵy baıqaýdyń basty ereksheligi - oblystaǵy árbir aýdan, qalaǵa halyqaralyq, respýblıkalyq, oblystyq óner baıqaýlarynyń laýreattary men úzdik mádenıet maıtalmandary arnaıy is-saparmen jiberilip úmitkerlerdi óz aımaqtarynda alǵashqy irikteýden ótkizdi.
«Ekinshi aınalymda - 127 qatysýshy baq synady. Tálimgerler-irikteýden ótkizgen aýdan úmitkerine jetekshilik jumystaryn júrgizdi. Aqtyq synda - 36 úmitker óner kórsetetin bolady. Onyń 24-i ánshilik, 12-si júrgizýshilik sheberlikterin pash etýi tıis»,- deıdi oblystyq mádenıet jáne halyq shyǵarmashylyǵy ortalyǵynyń dırektory Nurlan Ádilhanov.
Baıqaý erejesine sáıkes aqtyq synda qatysýshylar patrıottyq ándermen qatar, elimizge tanymal sazgerlerdiń ánderin oryndap, estrada álemindegi jańa qyrlaryn tanytýǵa tyrysady. Al, mádenı is-shara júrgizýshilerine sahna mádenıeti men sheberligi, sózge sheshendigi men tapqyrlyǵy jáne sharany júrgizýge shynaıy beıimdiligi syndy talap júktelip otyr.
Aıta keteıik, jyl saıyn dástúrge aınalǵan «Araı» baıqaýy qanshama jastardy óner aspanyna juldyz etip , bolashaqtaryna jol ashyp keledi. Baıqaýdan elimizge tanymal óner juldyzdary A.Jorabaeva, B.Isaev, V.Stýpın, M.Sadýaqasova, A.Júnisbekov syndy daryndar túlep ushqan.
