Shymkentte aptap ystyqtan bir aptada aýrýhanaǵa 10 adam tústi
Qalalyq №1 klınıkalyq aýrýhanasyna bir apta ishinde qan qysymy kóterilgen 10 naýqas jatqyzylǵan. Bul ótken aımen salystyrǵanda edáýir kóp. Dárigerler ystyq aýa raıynda asqynatyn aýrýy bar adamdar meılinshe syrtqa shyqpaǵany abzal dep otyr. Kúnine 2-2,5 lıtr sý iship, únemi bas kıimmen nemese qolshatyrmen júrý kerek ekenin eskertedi.
«Kún ysyǵan kezde asqynatyn aýrýlar bar. Mysaly, arterııalyq qan qysymy, júrektiń shamasyzdyǵy, júıke júıesimen aýyratyn adamdar, terisinde problemasy barlar. Kúnniń tikeleı adamǵa tııýine baılanysty aýrýlar asqynady. Múmkindiginshe syrtqa shyqpaǵan durys. Shyqqan kúnniń ózinde kóleńkemen, jeldetkishi bar kólikpen júrý kerek»,-dedi Shymkent qalalyq №1 klınıkalyq aýrýhanasynyń uıymdastyrý ádistemelik bóliminiń basshysy Qýanysh Lekerov.
Qala turǵyndarynyń bir bóligi ystyqtan qorǵaný úshin sýǵa túsýdi jón sanaıdy. Biraq, Tótenshe jaǵdaılar depratamentindegiler tek shomylýǵa ruqsat etilgen sý aıdyndaryna barýǵa keńes beredi jáne saqtyq sharalaryn qatań eskerý qajettigin eske salady.
«Sý aıdynynda qaýipsizdik erejelerin saqtańyzdar. Beıtanys jerde shomylmańyz, sýǵa mas kúıde túspeńiz. Balalardy sý mańaıynda qaraýsyz qaldyrmańyz. Júzý úshin taqtaısha, úrmeli matras, penoplasty paıdalanýǵa bolmaıdy. Eger júzý bilmeseńiz, belińizden asatyn sýǵa túspeýge keńes beremiz. Túnde sýǵa shomylmańyz. Jaǵalaýdan alys ketpeńizder»,-dep eskertedi Shymkent qalalyq TJD Azamattyq qorǵanys basqarmasynyń ofıtseri Serik Áýezhan.
Túrkistan oblysy men Shymkentt qalasynda aptap ystyq áli úsh kúnge jalǵasady. Sınoptıkterdiń málimetinshe, 8 maýsym kúni qalada 36-38 gradýs ystyq kútiledi. Al 9 maýsym aýa temperatýrasy 38-40 gradýsqa deıin kóteriledi dep boljanyp otyr. Tek 10 maýsym ǵana ystyqtyń beti qaıtady deıdi mamandar. Shamamen +33 jáne +35 gradýs bolady.