Shymkentte ańshy dúkeninde atys shyǵarǵan er adam 15 jylǵa sottaldy

ShYMKENT. QazAqparat – Shymkent qalasynda ańshylyq zattar dúkenine kirip, úsh adamǵa oq atqan er adamǵa qatysty sot úkimi shyqty, dep habarlaıdy QazAqparat tilshisi.

Oqıǵa bıylǵy 20 aqpan kúni saǵat 14:30 shamasynda bolǵan. Satyp alýshy retinde «Arsenal» ańshy dúkenine kelgen sottalýshy E.Ismoılovtyń qolynda sholaq myltyq bolǵan. Ol quny 403 000 teńge turatyn «Saıga 410K» qarýyn 7 oq-dárisimen ıemdenip, atys qarýyn oqtap, jábirlenýshi Z. Badrıtdenovaǵa qarata oq atqan. Alaıda, qarýda serippesiniń shappasy (boek) bolmaýyna baılanysty, oıyn júzege asyra almaı qalǵan.

Keıinnen sottalýshy qolynda tabeldik qarýy bar kúzetshilerge oq atqan. Saldarynan bireýiniń densaýlyǵyna – ortasha, al ekinshisine jeńil zııan keltirgen.

Oqıǵa ornyna der kezinde kelgen polıtsııa qyzmetkerleri kúdiktini sol mańda quryqtady.

Sot sheshimine sáıkes E.Ismoılov birneshe bap boıynsha kináli dep tanyldy – QR Qylmystyq kodeksiniń 288-babynyń 1-bóligi, 287-babynyń 3-bóligi, 24-babynyń 3-bóligi, 99-babynyń 2-bóliginiń 1),6),8) tarmaqshalary. Qylmystar jıyntyǵy boıynsha oǵan 15 jylǵa bas bostandyǵynan aıyrý jazasy taǵaıyndaldy.

«Sot jazany qylmystyq-atqarý júıesiniń qaýipsizdigi ortasha mekemesinde óteýdi belgiledi. Úkim zańdy kúshine engen joq» - delingen Shymkent qalasynyń qylmystyq ister jónindegi mamandandyrylǵan sotynyń baspasóz qyzmeti taratqan aqparatta.