Shymkentte alyp qashýdyń qurbany bolǵan boıjetken 3-qabattan sekirip ketti
ShYMKENT. QazAqparat - Shymkentte zorlanǵan 19 jastaǵy boıjetken úshinshi qabattan sekirgen. Qazir osy oqıǵa boıynsha qylmystyq is qozǵalyp, sotqa deıingi tergeý amaldary júrgizilýde, dep habarlaıdy QazAqparat tilshisi.
Boıjetkenniń qorǵaýshysy Erkin Qaharovtyń aıtýynsha, 18 qańtar kúni boıjetkendi erkinen tys alyp qashyp ketken.
«Arýjan ol jigitpen tanysyp, eki-úsh kún kezdesken, sosyn alyp qashqan. Barǵan soń ol kelin bolýǵa kónbegen. Biraq betin ashyp, rásimder jasalǵan. Qyzdyń ata-anasy onyń kónbegeni týraly bilmegen. Qyz bir apta boıy tósekke jatýǵa kelispegen, biraq 25 qańtar kúni ony erkinen tys zorlaǵan. Osydan keıin ol úshinshi qabattyń terezesinen sekirip ketken. Ol 31 qańtarda aýrýhanaǵa túskenimen, sol kúnnen bastap tergeý sharalary júrgizilmegen. Aýrýhanada júretin polıtseıler de nege ekeni belgisiz, bul qyzdyń jaǵdaıyna nazar aýdarmaǵan. Sosyn men aryzdanýǵa májbúr boldy. Artynsha Feısbýk áleýmettik jelisine jazǵannan keıin 4 aqpan kúni qylmystyq is qozǵaldy»,- deıdi Erkin Qaharov.
Qazir qyzdyń bel omyrtqasyna zaqym kelip, birneshe jerinen súıegi synǵan. Ortasha dárejede jaraqat alǵan boıjetken aýrýhanada em qabyldap jatyr. Osy oqıǵaǵa baılanysty qalalyq PD búgin ǵana resmı málimet taratty.
«Aǵymdaǵy jyldyń 31 qańtarynda 19 jasar qyzdyń óz-ózine qol jumsaý áreketi boıynsha QR QK 105-baby («Adamdy ózin-ózi óltirýge deıin jetkizý») boıynsha sotqa deıingi tergeý júrgizilip jatyr. Oqıǵanyń barlyq mán-jaıyn anyqtaý úshin kúdikti ál-Farabı aýdandyq polıtsııa bólimine jetkizildi. QR QPK 201 jáne QR QK 147-baptaryna sáıkes sotqa deıingi tergeý derekteri jarııa etýge jatpaıdy» delingen Shymkent qalalyq PD baspasóz qyzmetiniń habarlamasynda.
