Shymkentte alıment óndirý boıynsha jumys toby qurylady
Basqosýǵa qala ákimi Ǵabıdolla Ábdirahymov pen sot salasynyń, quqyq qorǵaý organy ókilderi men tóraǵalary qatysyp, pikir almasty, dep habarlaıdy QazAqparat tilshisi.
Jıynda sóz sóılegen jeke sot oryndaýshylardyń respýblıkalyq palatasynyń basqarma tóraǵasy Ernar Ibraev aǵymdaǵy jyldyń basynan beri jeke sot oryndaýshylarǵa qatysty 2000-nan astam aryz-shaǵym túskenin aıtyp ótti. Onyń ishinde 756 shaǵym alıment óndirý máselesine qatysty bolǵan. Jıynda qala ákimi Ǵabıdolla Ábdirahymov ta bul salada qordalanǵan biraz máseleler bar ekenin jetkizdi.
«Bul der kezinde kóterilip otyrǵan ózekti másele. Áli de bolsa túıini tarqatylmaǵan jumystardy birlese sheshýimiz kerek. Osy oraıda QR Ádilet mınıstrligi, respýblıkalyq palata jáne ákimdik arasynda memorandýmǵa qol qoıdyq. Taǵy qosymsha is-sharalar jospary bar. Al óńirlik deńgeıde Ádilet departamenti men jeke sot oryndaýshylar birlese jumys tobyn qurýy tıis. Sonyń nátıjesinde biz máselelerdi jyldam sheshe alamyz», - dedi qala ákimi.
Qoǵamda alıment tóleýden jaltaryp, is júzindegi tabystaryn jasyryp júrgen ákeler kóp. Shymkent qalasynyń Ádilet departamentiniń basshysy Orynbasar Tastanov óz baıandamasynda negizgi atqarylǵan jumystardan habardar etti.
Onyń málimdeýinshe, qazirgi tańda Shymkent qalasynyń sot oryndaýshylarynyń óndirisinde jalpy 7926 óndirý týraly is bar. 4737 balaǵa qatysty alıment tóleý óndirilýde. Onyń ishinde 2924 boryshker alımentti óz erikterimen tóleýde. Jalpy 3822 bala ózderine tıesili qarajatty qajetti deńgeıde ala almaı keledi.