Shymkentte alıment qaryzy 1 mln 300 myń teńgege jetken áke izdestirilýde
Ózekti máseleni kótergen óńirdiń prokýrorlary boryshkerlerden aqsha óndirý jaǵyn qarastyrdy, dep habarlaıdy QazAqparat HAA tilshisi.
Qadaǵalaý organy ókilderiniń sózinshe, ótken jyly sot oryndaýshylardyń qolynda 8580 balanyń múddesine qatysty 5002 atqarýshylyq is bolǵan. Sol boıynsha boryshkerlerdiń úshten ekisi alımentterdi oraıy kelgen kezde ǵana tólese, 20 paıyzy nemese 1000-ǵa jýyǵy áli kúnge jaltaryp otyr. Máselen, bir ákeniń balalary aldyndaǵy qaryzy 1 mln 300 myń teńgege jetipti. Ol bul qarajatty 2012 jyldan beri tólemegen bolyp shyqty.
«Bul boryshker qaryzyn tólemek túgili, qashyp ketken. Qazir biz osy azamatty izdestirýdemiz. Quzyrly organdarǵa habar berip, izdestirilip jatyr. Ondaı jaǵdaılar kezdesip turady. Arasynda tabylyp, óndirip jatqan jáıtter de bolady»,- deıdi jeke sot oryndaýshy Ashat Satybaldıev.
Bereshegin tólemeý derekterine taldaý júrgizgen prokýrorlar alıment qaryzdary barlardyń arasynda jumyssyzdar men amoraldy ómir saltyn ustanýshylar , ıaǵnı maskúnemder, nashaqorlar, turǵylyqty mekeni joq adamdar kezdesip otyrǵanyn aıtady.
«Kóptegen boryshkerler tabys kózi bola tura óz balasynan alıment tóleýden jaltaryp, olar sanaly túrde tólemderden qashyp keledi. Bazbiri jumys berýshimen eńbek shartyn jasaspaı, eńbekaqylaryn qolma-qol alyp, kiristerin tómendetip kórsetýde. Sondaı-aq, tekserý barysynda 26 atqarý qujattary boıynsha boryshkerdiń jumys orny bola tura sot oryndaýshylar olarǵa qatysty atqarý qujatyn joldamaǵan. Al, memlekettik sot oryndaýshylary 46 boryshkerdiń el aýmaǵynan shyǵýyna ýaqytsha shekteý qoıý jáne olardy jeke múlikteri tekserý, tıisti jaýapkershilikterge tartý sharalaryn júrgizbegen»,-deıdi Eńbekshi aýdany prokýrorynyń orynbasary Nurjigit Toqtarov.
Sondyqtan prokýrorlar endi qalada alımentter óndirip alý máseleleri jónindegi konsýltatıvtik-keńestik organ quryp, onyń quramyna sot oryndaýshylary, jumyspen qamtý ortalyǵy mamandary, quqyq qorǵaý organdary, sýdıalardy kirgizý qajet dep otyr. Ári bul keńes keminde toqsanyna bir ret otyrys jasap, onda týyndap otyrǵan máselerdi talqylaý kerektigin alǵa tartady.