Shymkentte Alǵys aıtý kúnine arnalǵan saltanatty shara ótti
ShYMKENT. QazAqparat - Shymkentte 1 naýryz - Alǵys aıtý kúnine arnalǵan saltanatty shara ótti. Qaladaǵy saltanat saraıynda uıymdastyrylǵan shara 200 jastyń «Myń alǵys!» fleshmobymen bastalyp, etnomádenı birlestikterdiń ókilderi tarapynan beıbitshilik belgisi retinde 1000 shar áýege ushyryldy , dep habarlaıdy QazAqparat HAA tilshisi.
Merekelik kezdesýde ótken ǵasyrda qazaq jerine kúshtep qonys aýdarylǵan mıllıondaǵan etnostardy óz baýyryna basyp, bir úzim nanyn teń bólisken qazaq halqynyń darhandyǵyn, Alǵys aıtý kúniniń mán-mańyzyn beıneleıtin «Qazaq eline myń alǵys!» beınerolıgi kópshilik nazaryna usynyldy.
Osynaý merekeniń tarıhı, saıası hám tárbıelik máni tereńde jatqanyn aıtyp, barsha óńir turǵyndaryn Alǵys aıtý kúnimen quttyqtaǵan oblys ákimi Janseıit Túımebaev jyl saıyn kóktem mezgiliniń osyndaı ıgilikti meırammen bastalatynyna qýanyshty ekenin jetkizdi.
«Qadirli jerlester! Keshirim - adamgershiliktiń arqaýy bolsa, alǵys aıtý - berekeli birliktiń bastaýy bolmaq. 1 naýryz - bul eń aldymen Elbasynyń beıbitshilik pen kelisim saıasatynyń saltanat qurǵan kúni. Bul ortaq taǵdyr toǵystyrǵan Qazaqstan halqynyń bir-birine ortaq syı-qurmet kórsetetin kúni. Osy sátti paıdalana otyryp, el Táýelsizdigin nyǵaıtýǵa, onyń qýatyn arttyrýǵa aıryqsha úles qosqan barsha azamattarǵa shynaıy alǵysymdy bildiremin», - degen aımaq basshysy.
Sonymen qatar, jıynda óńirdegi etnomádenı birlestikterdiń atynan Qazaqstan halqy Assambleıasy ortalyq quramynyń múshesi, oblystyq grýzın etnomádenı birlestiginiń tóraǵasy Zaal Bochoroshvılı sóz sóılep, barsha ult pen ulystardyń atynan Qazaq halqyna alǵysyn bildirdi.
Іs-sharada kezinde taǵdyr tálkegimen qazaq eline kelgen barsha etnostardyń qonystanýy týraly tarıhı málimetter arqaý bolǵan «Baýyrmal el - Qazaqstan!» taqyrybynda teatrlandyrylǵan-sahnalyq qoıylym kórsetilip, kezinde Ońtústik Qazaqstan oblysynda turǵan, qazirgi kezde alys jáne jaqyn shet elderde turatyn birqatar azamattardyń tilek-nıetteri toptastyrylǵan «Qazaq eline myń alǵys!» beınejoldaýy jurtshylyq nazaryna usynyldy. Merekelik shara eldegi yntymaq pen birlikti dáripteıtin kontserttik baǵdarlamaǵa ulasty. 
