Shymkentte alǵash ret medıtsına qyzmetkerleriniń alleıasy ashyldy
ShYMKENT. QazAqparat - Táýelsizdik kúni qarsańynda Shymkent qalasynyń «Abaı» saıabaǵynda Medıtsına qyzmetkerleriniń alleıasy ashyldy, dep habarlaıdy QazAqparat tilshisi.
Elimizde alǵash ret ashylǵan alleıa óńirdiń «Ońtústik medıtsına qyzmetkerleri qoǵamdyq birlestiginiń» bastamasymen jáne óńirdiń Densaýlyq saqtaý basqarmasynyń qoldaýymen boı kóterdi.
Eskertkishtiń ashylýyna oblys ákimi Janseıit Túımebaev pen oblystyq máslıhat depýtattary, medıtsına qyzmetkerleriniń ardagerleri men dárigerleri, medıtsınalyq joǵary jáne orta bilimdi oqý oryndarynyń qyzmetkerleri men stýdentter qatysty. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda alleıada úsh tas belgi ornatylǵan.
Alǵashqy tasta Qazaqstan Respýblıkasy dárigerleriniń antynan úzindi keltirilgen.
Ekinshi úlken tasta qazaqtyń alǵashqy shıpageri Óteıboıdaq Tileýqabylulynyń músini beınelengen. 525 jyl buryn ómirden ótken azamat shıpagerlik salasynda óz zamanynyń úzdigi bolǵan. Ári halqymyzǵa óshpes mura qaldyrǵan.
Al úshinshi tas belgi ózgeni qutqaramyn dep óz janyn pıda etken medıtsına qyzmetkerlerine arnalǵan. Demeýshilerdiń esebinen salynǵan bul alleıaǵa tanymal sáýletshi Asqar Mamyrbaev pen músinshi Ábdikárim Ahmetov jáne qurylysshy Rýslan Ysqaqovtyń eńbekteri sińdi. Jıynda eskertkishtiń búkil ońtústik óńiriniń medıtsına qyzmetkerleriniń yntymaǵy men birligin aıǵaqtaıtyn «sımvol» ekenin aıtqan aımaq basshysy ony ornatýǵa úles qosqan barsha azamattarǵa alǵysyn bildirdi.
