Shymkentte álemniń 46 eliniń ǵalymdary bas qosty
ShYMKENT. QazAqparat - Shymkentte álemniń 46 eliniń ǵalymdary bas qosty. Sheteldik qonaqtar M. Áýezov atyndaǵy Ońtústik Qazaqstan memlekettik ýnıversıtetinde ótken «Óndiristik tehnologııalar jáne ınjınırıng» atty ǵylymı konferentsııaǵa qatysty, dep habarlaıdy QazAqparat tilshisi.
Osymen tórtinshi ret uıymdastyrylǵan halyqaralyq sharaǵa Amerıka Qurama Shtattary, Ulybrıtanııa, Germanııa, Frantsııa, Reseı, Túrkııa, Malazııa sııaqty damyǵan elderdiń ǵalymdary arnaıy keldi. Olar alqaly májiliste ІT tehnologııany damytý, energııa kózderin saqtaý men agroónerkásip salasyndaǵy ózekti máselelerdi ortaǵa saldy. 46 elden kelgen 120-dan astam ǵalym qazaqstandyq áriptesteriniń jetistikterimen tanysyp, tájirıbe almasty. Ssebebi sońǵy jyldary Qazaqstan ǵylymnyń barlyq salalarynda úlken iri jetistikterge qol jetkizilýde. Bul baǵytta óz úlesin qosyp otyrǵandardyń qatarynda Muhtar Áýezov atyndaǵy Ońtústik Qazaqstan memlekettik ýnıversıtetiniń ǵalymdary da bar.
Jalpy, Shymkent - 2020 jyly TMD memleketteriniń mádenı astanasy bolyp bekitildi. Osyǵan oraı, ǵalymdar 2 200 jyldyq tarıhy bar kóne qalanyń arheologııalyq eskertkishterin qorǵap, zerdeleý jumystaryn júrgizip jatyr. Ustazdardyń izdenisi arqasynda Otyrar aýdanynda ejelgi Qańly memleketiniń kóne jádigerleri tabyldy. Besinshitóbe, Pyshaqshytóbe jáne Altyntóbe qorymynan tabylǵan dúnıeler qazir zerttelý ústinde.
Aıta keteıik, halyqaralyq jıynǵa 300-den astam maqala kelip túsken. Olar taıaý kúnderi tańdamaly jınaq bolyp basylatyn bolady.
