Shymkentte álemge áıgili Ramada jelisindegi qonaq úı kesheni ashyldy
Tórt juldyzdy ári halyqaralyq premıým-klassty qonaq úıdiń ashylý saltanatyna qatysqan qala ákimi Erlan Aıtahanov ınvestorlardy jáne qurylysqa qatysqan barlyq azamattardy jańa ǵımarattyń ashylýymen quttyqtady.
Shahar basshysy qonaq úıdiń úshinshi megapolısten ashylýy qala ınfraqurylymyna salynǵan zor ınvestıtsııa ekenin atap ótti. 2200 jyldyq tarıhy bar kóne shaharǵa 2020 jyly TMD elderiniń mádenı astanasy jylynyń ótýine oraı týrıster kóptep keletinin aıtqan qala basshysy týrıstik ınfraqurylymdy barynsha jaqsartýdy qamtydy. Sheteldik qonaqtardy joǵary deńgeıde kútip alý úshin óńirdegi áýejaı jáne temir jol jelilerinde sapaly qyzmetter kórsetilýin, bul turǵyda qonaq úılerdiń de deńgeıi joǵary bolýy úlken mánge ıe ekenin aıtty.
«Búgingi tańda qonaqjaılyq ındýstrııasy ekonomıkamyzdyń damýynyń áleýetti jáne bolashaǵy zor salalardyń biri bolyp tanylyp otyr. Qonaq úı bıznesi týrızmniń mańyzdy quraýshysy retinde júredi. Búginde memleket tarapynan kásipkerlikti damytý boıynsha kóptegen qoldaýlar kórsetilýde. Kásipkerge osy isti damytý úshin »Damý« qorynan qarjylaı kómek berilgenin de aıtqym keledi»,- dedi Erlan Aıtahanov.
Aıta keteıik, álemdik jelidegi Ramada qonaq úıi Almaty qalasynan keıin Shymkentte salynyp otyr. Qonaq úıdi ınvestor jergilikti bıliktiń kómek-qoldaýymen eki jyl ishinde kóterdi.
