Shymkentte aldaǵy eki aıda 104 jańa aıaldama paıda bolady
ShYMKENT. QazAqparat - Shymkentte aldaǵy eki aıda jańadan 104 aıaldama salynady.
Sebebi, shyraıly shaharǵa Saıram aýdanynan qosylǵan eldimekenderde aıaldamalar tapshylyǵy seziledi. Bul týraly qala ákimi Ǵabıdolla Ábdirahymov kezekti jıynda málimdedi, dep habarlaıdy QazAqparat HAA tilshisi.
Sondaı-aq qaladaǵy eski aıaldamalardy abattandyrý jumystary qolǵa alynatyn bolady. Shahar basshysynyń sózinshe, oblys ortalyǵyndaǵy aıaldamalardyń basym deni jekeniń qolyna ótip ketken. 2006-shy jyldary aıaldamalardyń biraz bóligin menshiktep alǵan azamattar búginde saýda dúńgirshekterin ashyp alǵan. Bir otbasynyń tabys kózine aınalǵan bul oryndardy retke keltirmese qala basshylyǵy ony memleketke qaıtaryp almaq. Aıaldamalardy jańartý úshin atqarýshy bılik ókilderi menshik ıelerine túsindirme jumystaryn júrgizip, usynys ta jasaǵan. Alaıda olardyń kópshiligi qoǵamdyq oryndardy retke keltirýge qulyqsyzdyq tanytýda eken.
«Bizdiń sáýlet-qurylys bólimi bergen dızaınǵa qarap,aıaldamalaryńyzdy aýystyryńyzdar dep, aıaldama qojaıyndaryna ortaq talap qoıǵan bolatynbyz. Sol kezde ǵana ol aıaldamalardy buzbaımyz, kelisimshart bitkenshe jumys isteı alady»,-dedi Ǵ.Ábdirahymov.
Sondyqtan ákimdik sot arqyly aıaldamalardy memleketke qaıtaryp, abattandyrý jumystaryn ózi júrgizbek. Óıtkeni, shahardyń Bas jospary ózgergen soń bul másele bir júıege keltirýdi talap etedi. Qoǵamdyq kólik keptelisteriniń kópshiligi osy sebepten oryn alýda. Óz kezeginde jergilikti bıliktiń bul bastamasyn depýtattar da qoldap otyr.
