Shymkentte ákimdik departamentiniń basshysy tergelip jatyr

NUR-SULTAN. QazAqparat - Shymkent qalalyq Memlekettik múlik jáne jekeshelendirý departamentiniń basshysy bıýdjet qarjysyn urlaý kúdigine ilindi. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov aıtty, dep habarlaıdy QazAqparat tilshisi.

«Shymkent qalalyq sybaılas jemqorlyqqa qarsy qyzmet sybaılas jemqorlyq qylmysyn jasady degen kúdikke ilingen «Shymkent qalasynyń Memlekettik múlik jáne jekeshelendirý departamenti» MM basshysyna qatysty sotqa deıingi tergeýdi bastady « , - dedi ol agenttiktiń onlaın-brıfıngi barysynda.

Atap ótilgendeı, ol 2019 jyldyń maýsym aıynda merdiger jáne basqa tulǵalar tobymen áreket etip, naqty oryndalmaǵan jumystar úshin aktige qol qoıdy, solaısha, departament ǵımaratyn aǵymdaǵy jóndeýge bólingen bıýdjettiń 7 mıllıon teńgesin jymqyrdy degen kúdikke ilingen.

«Sotqa deıingi tergeý jalǵasýda. Kúdiktilerdiń kinásiniń deńgeıi týraly túpkilikti sheshimdi sot shyǵarady», - dedi Danııar Bıǵaıdarov.