Shymkentte ákimder halyqqa esep bere bastady
ShYMKENT. QazAqparat - Shymkentte ákimderdiń halyq aldynda esep berý jumystary qyza tústi, - dep habarlaıdy QazAqparat tilshisi.
Búgin Shymkent qalasy ákimi Ǵ.Ábdirahymovtyń qatysýymen T.Tájibaev atyndaǵy № 81 jalpy orta mektebinde Abaı aýdany ákiminiń jyldyq esebi tyńdalmaq. Al kúni keshe Eńbekshi aýdanynyń ákimi Ǵalymjan Ilııasov halyq aldynda atqarǵan jumystary jóninde baıandap berdi. Esepti turǵyndar jyly qabyldaǵanymen, aldaǵy jumystardyń da az emestigi baıqalady.
Eńbekshi aýdanynda 256 myńnan astam turǵyn bar, 630 kópqabatty, 42 myńnan astam jeke sektordaǵy turǵyn úı ornalasqan.
Eńbekshi aýdany ákimi Ǵalymjan Ilııasov jańa 2017 jylǵa aýdannyń ortalyq aýmaǵynda ornalasqan 58 úıdiń sport alańshalaryn ornatý úshin bıýdjettik ótinim berilgenin, al 2016 jyly aýdan aýmaǵynda ornalasqan 321 kópqabatty úıdiń aýlasy túngi jaryq shamdarymen qamtylǵanyn atap ótti.
Qazir aýdandaǵy 510 kósheniń 19-ynda múlde ataý joq. Bul ásirese, jedel járdem qyzmetine júgingende qıyndyq týǵyzady. «Jedel járdem qyzmetin shaqyrsa, turǵyndarǵa kósheniń basynan kútip alyńdar deıdi. Eger ol jalǵysbasty ana, jalǵyzbasty naýqas bolsa, ol ne isteý kerek?» - dedi qalalyq máslıhat depýtaty Ermek Dármenov. Aýdan boıynsha 142 kóshege balalar alańshasyn salý, 24 kópqabatty úıdi jańǵyrtý qajet. Sondaı-aq, aıaqjoldar men jeke sektordaǵy turǵyn úılerge káriz júıelerin tartý jumystary da kezegin kútýde.
Al Eńbekshi aýdany ákimi esebine qatysqan Shymkent qalasy ákiminiń orynbasary B.Janbosynov bıyl qala boıynsha 215 kósheniń jóndeý jumystary jasalynyp, 42 kóshege jaryqtandyrý jumystary júrgiziletinin jetkizdi.
Erlan Júnisbaıuly
