Shymkentte aǵzasynan synap tabylǵan náresteniń qazirgi jaǵdaıy qalaı

ShYMKENT. QazAqparat - Shymkentte aǵzasynan kóp mólsherde synap tabylǵan náresteniń qazirgi jaǵdaıy týraly dárigerler aıtyp berdi. Qalalyq klınıkalyq balalar aýrýhanasynyń bólim meńgerýshisi Gúljanat Naýryzovanyń sózinshe, sábıdiń asqazan ishek joldarynan bógde zattardyń evakýatsııasy baıqalady, dep habarlaıdy QazAqparat tilshisi.

«Qazirgi kezde balanyń qusýy toqtaǵan. Dene qyzýy tómendedi. Búgingi dınamıkadaǵy ishtiń rentgen sýretinde asqazan ishek-jolyndaǵy bógde zattardyń evakýatsııasy baıqalady. Olar nájisimen syrtqa shyǵyp jatyr. Qajetti emin alýda. Jaǵdaıy da, kóńil kúıi de jaqsy»,- deıdi  pýlmonologııa  bóliminiń  meńgerýshisi Gúljanat Naýryzova.

Eske salaıyq, Shymkentte jedel-járdemmen aýrýhanaǵa túsken eki aılyq náresteniń jaǵdaıy nasharlap, toqtaýsyz qusa bergen bolatyn. Dárigerlerge anasy balanyń jórgegin aýystyrǵan kezde nájis arasynan synaptar domalanyp shyqqanyn  kórgenin aıtqan. Náresteni tamaqtandyratyn qurǵaq qospadan da suıyq metall bólshekteri tabylǵan.

Al, kúni keshe QR DSM Qoǵamdyq densaýlyq saqtaý komıtetiniń tóraǵasy Jandarbek Bekshın Germanııada shyǵarylǵan qospanyń quramyn taldaýǵa zerthanaǵa jibergenin jarııa etti. Sondaı-aq, saýda ortalyqtary men dárihanalarda «Humana» balalar taǵamy qospasyn saraptamaǵa alyp, qazirgi tańda olardy satý men taratýdy toqtatqanyn atap ótti.

«3-4 kún ishinde nátıjesi shyqqan soń naqty sharalar qolǵa alynady» degen bolatyn bas sanıtar dáriger.