Shymkentte aǵymdaǵy jyly 4 jańa mektep ashylǵan

ShYMKENT. QazAqparat – Shymkent qalasynda aǵymdaǵy jyly bıýdjetten 15 mekteptiń qurylysyn júrgizý úshin 7,5 mlrd teńge qarjy bólingen. Onyń ishinde 9 mekteptiń qurylysy Respýblıkalyq bıýdjet esebinen salynýda, dep habarlaıdy QazAqparat tilshisi.

Qalalyq Bilim basqarmasynyń bólim basshysy Serik Babaqulovtyń málimetinshe, 9 mektep qurylysynyń jalpy quny 6,5 mlrd​ teńgeni quraıdy. Aǵymdaǵy jyly atalǵan mektepterdiń ishinde 4 jańa mektep pen 1 qosymsha qurylys paıdalanýǵa berilip, qalǵan bilim oshaqtarynyń qurylysy kelisimshartqa sáıkes 2020 jylǵa ótpeli qalyp otyr. Qazirgi tańda qurylysy júrgizilip jatqan nysandardyń qatarynda Turan shaǵyn aýdanynda 1200 oryndyq, Samal-3 shaǵyn aýdanynda​ 1200 orynǵa arnalǵan eki birdeı mektep bar. Al Asar-2 shaǵyn aýdanynda 1200 oryndyq, Abdýlabad turǵyn alabynda №101 mektep korpýsy janynan da 300 oryndyq jańa nysan qurylysy júrýde. Sonymen birge Turan shaǵyn aýdanynan 1200 oryndyq №63 mekteptiń qosymsha ǵımaratynyń qurylysy júrýde. Buǵan qosa bıylǵy jyly jergilikti bıýdjetten 264 mln tenge qarjy qaralyp, 121 mekteptiń ǵımarattary aǵymdaǵy jóndeýden ótkizilgen.