Shymkentte adamdar turyp jatqan kópqabatty úıdiń jeri 58 myń teńgege satylyp ketti
ShYMKENT. QazAqparat - Shymkentte bes qabatty úıdiń jeri jekeniń qolyna ótip ketken.
Turǵyndar bul týraly jýyrda ǵana bilgendigin aıtýda. Endi 38 páterli úıdiń jerin qaıtarý úshin sotqa shaǵymdanǵan, dep habarlaıdy QazAqparat HAA tilshisi.
Qujattarǵa sáıkes, kásipker kelinshek Jeltoqsan kóshesindegi 26-shy úıdiń turǵan jerin, aldyndaǵy kóshesimen birge Shymkent qalalyq jer qatynastary bóliminen satyp alǵan. Ótken jyldyń qarasha aıynda rásimdelgen qujatta taraptar arasynda satý-satyp alý kelisimsharty jasalyp, qala ortalyǵyndaǵy 0,1087 ga jer bar bolǵany 58 650 teńgege satylyp ketken. Onyń ishinde 0,0023 ga jerge sulýlyq salony salynady dep kórsetilgen. Turǵyndar bul jańalyqty aıaq astynan estip qalǵanyn aıtady.
«Bizdiń úıdiń birinshi qabatyndaǵy páterdi bir kelinshek satyp alyp, sulýlyq salonyn salmaqshy boldy. Kommertsııalyq nysannyń bizdiń ruqsatymyzsyz salynyp jatqanyna Ál-Farabı aýdandyq sotyna júgindik. Sotta ol azamatshanyń jerge ıelik etetindigi týraly memlekettik akti kórsetildi. Qujatqa sáıkes, ol sulýlyq salonyn ǵana emes, biz turatyn kópqabatty úıdiń 11 sotyq jerin kólik júretin aldyndaǵy jolymen birge zańdastyryp alǵan bolyp shyqty. Satý baǵasy da qısynǵa kelmeıdi - 58 650 teńge», - deıdi kópqabatty úıdiń turǵyny Olga Om.
«Biz sulýlyq salonyn salýǵa qarsy boldyq. Sebebi úıdiń kireberisinde tazalyq bolmaıdy, káriz qubyrlary bitelip qalady. Sóıtsek, bizdiń turǵan jerimiz de satylyp ketken. Biz turyp jatqan úıimizdiń jerin satyp jiberý zańǵa qaıshy emes pe?», - deıdi taǵy bir turǵyn Vadım Troıanovskıı.
Turǵyndardyń sózinshe, olar Sybaılas jemqorlyqqa qarsy is-qımyl ulttyq bıýrosynyń OQO boıynsha departamentine, Shymkent qalalyq jer qatynastary, sáýlet jáne qala qurylysy bólimderine shaǵymdanǵan. Jaýap tek jer qatynastary bóliminen keldi.
«Shymkent qalalyq jer qatynastary bólimine berilgen aryzdaryńyz boıynsha mamandar tıisti tekserýler júrgizdi. Jeltoqsan kóshesindegi 26-úıdiń jer ýchaskesi men sulýlyq salonynyń jer telimi qala ákiminiń 16.11.2016 jylǵy №2176 qaýlysyna sáıkes, jalpy kólemi 1087 sharshy metr jer N.A. Ábdirazaqovaǵa berilgen. Atalǵan jer telimin qosymsha tekserý úshin oblystyq sáýlet-qurylys baqylaý jáne jer ınspektsııasy basqarmalaryna, sondaı-aq qalalyq sáýlet jáne qala qurylysy bólimderine joldandy. Berilgen jaýapqa qanaǵattanbaǵan jaǵdaıda joǵary turǵan organdarǵa shaǵymdanýlaryńyzǵa bolady», - delingen Shymkent qalalyq jer qatynastary bóliminiń basshysy Q.Saılaýovtyń bergen jaýap hatynda.
Nátıjesinde turǵyndar Ál-Farabı aýdandyq sotyna aryzdandy. Qalaı bolǵanda da kópqabatty úıdiń páter ıeleri sottan ádildik bolmasa, dalada qalyp ketemiz be dep qorqyp otyr.
