Shymkentte ÁCh júldegerin eske alýǵa arnalǵan týrnır bastaldy
ASTANA. QazAqparat - Shymkentte úsh qarǵyp sekirýden 1987 jylǵy álem chempıonatynyń qola júldegeri Oleg Sakırkındi eske alýǵa arnalǵan respýblıkalyq týrnır bastaldy, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Respýblıkalyq týrnır Shymkent qalasyndaǵy jeńil atletıka manejinde ótip jatyr. Eki kúnge jalǵasatyn básekege qatysýshylar 10 saıys boıynsha synǵa túspek.
Tarqatyp aıtsaq, erler men áıelder 60, 200, 400, 800, 1500, 3000 metrge júgirý, 60 metrge tosqaýyldar arqyly júgirý, uzyndyqqa, bıiktikke jáne úsh qarǵyp sekirý boıynsha óner kórsetedi.
Atalǵan týrnırde Ońtústik Qazaqstan, Qaraǵandy, Jambyl jáne Almaty oblystarynyń atletteri júldeli oryndardy sarapqa salady. Jeńimpazdar men júldegerlerdi arnaıy estelik medaldar, dıplom jáne aqshalaı syıaqy alady. Basty syılyq erler arasyndaǵy úsh qarǵyp sekirýdiń jeńimpazyna beriledi. Óıtkeni Oleg Sakırkın kezinde jeńil atletıkanyń osy saıys túrinen óner kórsetken.
Oleg Sakırkın ótken ǵasyrdyń 80-90 jyldaryndaǵy elimizdegi úsh qarǵyp sekirýshilerdiń biri boldy. 1987 jyly Rımde ótken álem chempıonatynda qola júlde enshilegen. Jabyq keshendegi Eýropa chempıonatynyń jeńimpazy. Azııa oıyndary, Azııa chempıonaty, dúnıejúzilik stýdentter ýnıversıadasynda talaı márte Qazaqstan qorjyna olja salǵan. Eń úzdik nátıjesi - 17, 58 metr (1989 jyly). Bul kórsetkishti Qazaqstanda áli kúnge eshkim jańartqan joq. Ol 2015 jyldyń naýryz aıynda 49 jasynda dúnıeden ótti.
