Shymkentte 9-synyp oqýshysy iz-túzsiz joǵalyp ketti
ShYMKENT. QazAqparat - Shymkentte 9-synyp oqýshysy iz-túzsiz joǵalyp ketti. 15 jasar Roza Rasýlmetovanyń ata-anasy kómek surap, QazAqparat tilshisine habarlasty.
Jasóspirimniń ákesi Halmatjan Irıstaevtyń aıtýynsha, Roza Shymkenttiń irgesindegi Saıram aýylyndaǵy óz úıinen 2-sáýir kúni tústen keıin shyǵyp ketken. Sodan beri qyzdan habar bolmaǵan
«Sol kúni anasy aýyryp qalyp, mektepke bara almady. Túske deıin áıelime kómektesip, úıde boldy. Al, tústen keıin ketip qalǵan. Qaıda baratynyn aıtpaǵan. Biz ony kelip qalatyn shyǵar dep keshke deıin kúttik, keshkisin izdeı bastadyq. Týystarymyzben qosylyp tórt kún izdedik. Bolmaǵan soń, polıtsııaǵa aryzdandyq», - deıdi joǵalǵan qyzdyń ákesi.
Rozanyń ata-anasy 6 sáýir kúni Qarataý aýdandyq polıtsııa bólimi men Oblystyq ІІD-ge aryz túsirgen. Sodan beri jasóspirim tabylmaı otyr eken. Tártip saqshylary Rozanyń tek uıaly telefonyn tapqan. Aıtýlarynsha, «Garant» dúkeni mańynda bir beıtanys qyz bir jigitke satyp ketipti. Biraq ony kim satqany, jasóspirimnen qalaı alǵany belgisiz kúıinde qalyp otyr.
«Biz ózdigimizden qyzymyzdy izdep, onyń sońǵy ret kimmen sóıleskenin operatorlardan anyqtadyq. Birneshe nómer tabyldy. Ony Qarataý aýdandyq polıtsııa bólimine aparyp ta berdik. Biraq polıtsııadan áli habar joq. Qyzymnyń belgileri: boıy 1,65 m, shashynyń túsi qara, qysqa (únemi býyp júredi). Kózi men qasy qara tústi, minezi ashyq, adamdarmen tez til tabysyp ketedi», - deıdi anasy Dılobar Irıstaeva.
