Shymkentte 9 adamdy qaraqurt shaǵyp aldy
T.Orynbaev atyndaǵy gıperbarııalyq oksıgenatsııa ortalyǵynda qaraqurt shaqqan 8 naýqas emdelip shyqty.
Bir naýqas jansaqtaý bóliminen palataǵa aýystyryldy. Jaǵdaıy birqalypty. Em-dom qabyldap jatyr.
«Mamyr aıynda qaraqurt shaǵyp alǵan 5 naýqas, maýsym aıynda 4 naýqas statsıonarlyq em qabyldady. Al, jylan shaqqan 4 turǵyn men saryshaıan shaqqan 5 qaralýshy statsıonarly em aldy. Jaǵdaılary jaqsy. Sondaı-aq, saryshaıan shaqqan 16 naýqasqa alǵashqy kómek kórsetilip, ambýlatorly em taǵaıyndaldy», - deıdi ortalyqtyń bas dárigeri Madına Ermahanbetova.
Dárigerler jazǵy maýsymda qaraqurt pen jylannan jáne saryshaıannan qorǵaný kerektigin eskertedi.
Ásirese, aýlasynda qurylys jumysyn júrgizip jatqan turǵyndar saqtyq sharalaryn erekshe saqtaǵany jón.
Sebebi, qaraqurt pen jylan, saryshaıan sol qurylys materıaldary arqyly kelip jatqan jaıy bar.
«Jel soǵyp turǵan sátte dalada jatýǵa bolmaıdy. Tabıǵat aıasyna shyqqan sátte aıaqty jaýyp turatyn aıaq kıim kııý kerek. Sondaı-aq, qurylys materıaldaryn tasyǵanda muqııat bolǵan jón. Ózen mańynan jetkiziletin qum men topyraqtan qaraqurt shyǵýy múmkin. Kıimdi de bir tekserip baryp, sodan keıin kııý qajet. Eger qaraqurt, jylan, saryshaıan shaqsa mindetti túrde dárigerge kórinińiz», - deıdi dáriger Madına Ermahanbetova.