Shymkentte 800 ımam qatysqan forým ótti
«Rýhanı qundylyqtyń qaınar kózi bolǵan Islam dini ár nárseni óz ólshemimen jasaýǵa úndeıdi. Imandylyq joly – tirshilikti tárk etý degen sóz emes. Tirshiliktiń qulshylyqsyz quny bolmaıtyny sekildi, qulshylyqtyń da tirshiliksiz máni joq. Islam barlyq istiń ózindik ortasyn ustanýdy úıretedi. Bul jol týralyqqa úndeıdi. Týralyq sáttilikke, al sáttilik baqytqa jol bastaıdy. Іzgi ǵulamalar urpaǵyna eki nárseni ósıet etken. Osy ekeýin ustanǵan adam baqytqa keneledi. Birinshisi – tirshilik úshin dúnıe-dáýletti berik ustaý, ekinshisi – qulshylyq úshin dindi berik ustaý. Osy rette ımandylyq jolyndaǵy jastarǵa aıtarym – halyqqa qyzmet etý isinde dúnıe men dinniń ıgilikterin qustyń qos qanatyndaı ustańyzdar. Alla Taǵala qasıetti Quranda musylman balasyna qalaı duǵa jasaýdy úıretkendeı, biz bul dúnıe men o dúnıeniń ıgilikteri men nyǵmetterin suraýymyz tıis. Sonda ǵana qos dúnıeniń baqytyna bólenemiz», - dedi Serikbaı Satybaldyuly.
Aıta keteıik, QMDB-nyń Túrkistan oblysy men Shymkent qalasy ókildiginiń uıymdastyrýymen ótken aımaqtyq ımamdar forýmyna Bas múftı Serikbaı qajy Oraz, Shymkent qalasynyń ákimi Erlan Aıtahanov, memleket jáne qoǵam qaıratkerleri - Shalataı Myrzahmetov, Saılaýkúl Baraqova, belgili ǵalym, professor Dosaı Kenjetaı, t.b. zııaly qaýym ókilderi, medrese-kolledj shákirtteri jáne óńirdegi 800 ımam qatysty.
