Shymkentte 71 jastaǵy qarııa órtengen úıdiń ishinde qalyp ketti
Oqıǵa 25 shilde kúni túngi saǵat 00:15-te shamasynda bolǵan. Abaı aýdanyndaǵy Shaýmıana kóshesi boıynda ornalasqan jalpy kólemi 81 sharshy metr úıdiń shatyry tolyǵymen janyp ketken.
Sondaı-aq, kólemi 36 sharshy metr bolatyn eki bólme men úı zattary otqa oranǵan.
Oqıǵa ornynda Shymkent qalasy tótenshe jaǵdaılar departamenti órt sóndirý qyzmetiniń 14 qyzmetkeri men 3 tehnıkasy, apattar medıtsınasy brıgadasy jumyldyryldy.
«Aýmaǵy 12 sharshy metr qonaq bólmesiniń laı men qamystan jasalǵan tóbe jappasy qulady. Tilsiz jaý saǵat 00:44-de oqshaýlanyp, 01:10 shamasynda tolyǵymen sóndirildi. Úıdiń ishinen 1951 jylǵy er kisiniń denesi tabyldy. Órttiń shyǵý sebepteri anyqtalyp jatyr», - delingen Shymkent qalalyq TJD qoǵammen baılanys toby taratqan habarlamada.