Shymkentte 70 otbasy Jańa jyldy jańa úıde qarsy alady
ASTANA. QazAqparat - Búgin Shymkent qalasyndaǵy ákimshilik-iskerlik ortalyǵynda ornalasqan 216 páterli 9 qabatty eki turǵyn úı paıdalanýǵa berildi, dep habarlaıdy OQO ákiminiń baspasóz qyzmeti.
Saltanatty sharaǵa qatysqan oblys ákimi J.Túımebaev osy kúni 70 otbasyǵa páter kiltin tabystap, jas otbasylardy jańa qonystarymen quttyqtady.
«Kópten kútken qýanyshqa qol jetkizgen jas otbasylar endi jańa jyldy jańa qonysta qarsy almaq. Búginde elimizde jastardyń bilim alýyna túrli jaǵdaılar jasalyp, jumyspen jáne turǵyn úımen qamtylý úshin keshendi baǵdarlamalar júzege asýda. Bul óz kezeginde Elbasynyń jastarǵa jasaǵan qamqorlyǵynyń bir parasy ǵana»,- dedi ákim.
Áleýmettik nysan «Nurly jol» memlekettik baǵdarlamasy aıasynda salynyp, páterler «Turǵyn úı qurylys jınaq banki» jas otbasy sanatyna jatatyn otbasylarǵa satyp alý quqyǵymen jalǵa berý arqyly júzege asyrylýda.
Qazirgi tańda «Turǵyn úı qurylys jınaq banki» AQ-y jelisiniń «Jas otbasy» baǵyty boıynsha 328 jas otbasy ótinim berip, onyń ishinde tólem qabilettigin rastaǵan 216 jas otbasyny turǵyn úımen qamtý kózdelip otyr.
Búginde 90 azamat joldamany elektrondy túrde alyp, 73 azamat tólem qabilettigin rastaǵan. Baǵdarlamaǵa qatysýǵa ótinim bergen qalǵan jas otbasylar aldaǵy ýaqytta turǵyn úımen qamtylatyn bolady.
Eske salsaq, atalǵan baǵdarlama aıasynda 2014 jyly 84 otbasy, 2015 jyly 270 jas otbasy baspanamen qamtylyp, qonys toılaryn toılaǵan.
